Deon Fourie (55) is sedert 10 November in die hospitaal nadat hy en sy broer, Johnathan (52), by die hoenderfabriek Chubby Chick op Potchefstroom geskiet is.

Die Fourie-familie besit die hoendermaatskappy al jare lank en die broers het die dit oorgeneem ná die dood van hul pa, John.

Basil Kletz, familievriend van die Fouries, sê Deon het Dinsdag (25/11) sy oë oopgemaak terwyl dokters en personeel rondom hom gewerk het. Hy het net gesê: “So besig.”

“Die traumadokters en verpleegpersoneel wat na hom omsien is uitstekend. Hy reageer op sy familie se teenwoordigheid en wanneer hulle met hom praat. Hy word egter baie vinnig moeg en slaap meestal.”

Die maatskappy sê in ’n verklaring Deon is verskeie kere geskiet ná ’n vergadering oor ’n eiendomstransaksie. Die beskuldigde, Robert Joubert (73), het na bewering die perseel na die vergadering verlaat, maar het sowat ’n halfuur later teruggekeer.

Die Fourie-familie. Foto verskaf

Fourie is in die raadsaal geskiet, maar kon hulp ontbied. Johnathan het hom kom help en is ook geskiet. Hy is op die toneel dood.

Deon is per helikopter na ’n Gautengse hospitaal geneem, waar hy ’n noodoperasie ondergaan het. Hy is Donderdag (20/11) weer geopereer.

Veiligheidswagte het kort daarna opgedaag wat gelei het tot ’n skietery waarin Joubert gewond is. Hy is onder polisiebewaking by die Potchefstroom Provinsiale Hospitaal, sê kol Adéle Myburgh, provinsiale polisiewoordvoerder.

Robert Joubert (73)  sal moontlik volgende maand in die hof verskyn. Foto: Facebook 

Die saak is Woensdag (19/11) in sy afwesigheid in die distrikshof aangehoor. Joubert word van moord en poging tot moord aangekla  en die saak is tot 11 Desember uitgestel.

• Het jy ’n nuuswenk om te deel? Bel of WhatsApp die OFM Nuuslyn: 066 487 1427.

OFM Nuus dg