Die waarskuwing geld veral die suidweste van Noordwes, die ooste en noorde van die Vrystaat, asook Suid-Gauteng. KwaZulu-Natal (behalwe die verre noordooste). Mpumalanga se Hoëveld en die suidweste van Limpopo is ook ingesluit.

Volgens die weerdiens word die gelokaliseerde oorstroming van paaie, nedersettings en lae brûe voorspel.

Daarbenewens kan uitermatige weerlig en hael verwag word, met groot korrels wat in oop gebiede kan val. Sterk, skadelike winde kan ook verwoesting saai.

Noordwes

 Inwoners word gewaarsku teen warm en gedeeltelik bewolkte toestande met verspreide middagbuie en donderstorms. Die suidwestelike dele word die ergste geraak en sterk winde en veral hael kan gevaar inhou.

Vrystaat

Mooiweer tot baie warm toestande word verwag wat later gedeeltelik bewolk word. Verspreide donderstorms word in die ooste en noorde verwag, terwyl ’n uiters hoë brandgevaar in die Wes-Vrystaat heers.

Gedeeltelik bewolkte toestande word oor die Noord-Kaap voorspel. Foto: Morné van Rooyen

Noord-Kaap

Die Noord-Kaap beleef mooiweer en baie warm toestande, veral in die ooste. Later word dit gedeeltelik bewolk, met geïsoleerde middagbuie en donderstorms oor die noordoostelike dele. 

Die brandgevaar is hier ook uiters hoog en inwoners word gemaan om versigtig te wees met oop vure en wanneer hulle vleis braai.

Gauteng

Inwoners van Suid-Gauteng kan gedeeltelik bewolkte en warm toestande verwag met verspreide middagbuie en donderstorms. Die gevaar van gelokaliseerde oorstromings en hael is hoog. 

Die UVB-sonbrandindeks is “hoog”, en inwoners moet voorsorg tref.

‘Wees versigtig’

Die weerdiens beklemtoon inwoners in die betrokke provinsies moet waaksaam wees, veral motoriste op paaie wat geneig is tot oorstromings. 

Gemeenskappe word aangeraai om veiligheid eerste te stel, en om noodnommers byderhand te hou.

Met die somer wat sy spiere begin wys, herinner die weerdiens die publiek dat warm, droë toestande en onvoorspelbare storms dikwels hand aan hand gaan – en voorbereiding en versigtigheid bied die beste beskerming.

• Het jy ’n nuuswenk om te deel? Skakel of whatsapp die OFM Nuus-lyn: 066 487 1427.

OFM Nuus dg