Robert Joubert (73) kon nie Donderdag (11/12) in die Potchefstroomse hof wees toe sy saak voorgekom het nie. Hy staan reeds tereg op ’n aanklag van moord met voorbedagte rade op Jonathan Fourie (55) sowel as poging tot moord op sy broer, Deon (52).

Nog twee aanklagte van poging tot moord word by die klagstaat gevoeg, sê, kol. Adéle Myburgh, provinsiale polisiewoordvoerder. “Joubert word steeds in die Potchefstroomse provinsiale hospitaal behandel. Die beserings aan albei sy arms is baie ernstig.”

LEES OOK: Noordwes-broers glo geskiet, een noodlottig

Joubert het na bewering die broers – albei direkteure van die hoenderonderneming Chubby Chick in Potchefstroom – op 10 November geskiet.

Hulle het glo oor ’n eiendomstransaksie vergader, volgens ’n verklaring deur die maatskappy. Joubert het na bewering die perseel ná die besprekings verlaat, maar het ongeveer ’n halfuur later teruggekeer. 

Jonathan is op die toneel dood, terwyl Deon verskeie skietwonde, waaronder in sy nek, oorleef het.

Johnathan Fourie en sy vrou, Nadine. Foto: Facebook

Veiligheidswagte het kort daarna opgedaag, en Joubert is gewond in die daaropvolgende skietery. Hy word steeds in ’n ernstige maar stabiele toestand in die intensiewesorgeenheid van ’n Johannesburgse hospitaal behandel.

Basil Kletz, ’n familievriend van die Fouries, sê Deon het goeie en moeilike dae in die waakeenheid beleef. Sedert hy opgeneem is, is ’n dreineringspyp uit sy long verwyder en het hy dialise ontvang.

Die Fourie-broers saam met hul pa, John. Foto: verskaf

Deon het die afgelope week nog ’n prosedure ondergaan, sê hy. “Hy het ’n lang pad na herstel.”

’n Lewensvieringsdiens is Maandag (8/12) vir Jonathan in Potchefstroom gehou. Die familie vra mense moet steeds vir sy broer bid.

• Het jy ’n nuuswenk om te deel? Bel of whatsapp die OFM Nuus-lyn: 066 487 1427.

OFM Nuus/Charne van der Merwe dg