Central SA
Ontvoeringsaak: Bloemfontein-beampte se saak uitgestel vir beslissing─── CHARNÉ VAN DER MERWE 14:52 Fri, 16 Jan 2026
’n Bloemfonteinse polisiebeampte, wat na bewering ’n leerder met spesiale onderwysbehoeftes ontvoer het, sal op 17 Februarie hoor in watter hof sy saak aangehoor gaan word.
Sersant Nzima Adoons het Vrydag (16/1) in die Bloemfonteinse landdroshof verskyn op aanklagte van ontvoering en afpersing. Die saak spruit uit die beweerde ontvoering van Kamogelo Baukudi (19), ’n leerder aan die Martie du Plessis Spesiale Skool.
Adoons se vorige hofverskyning was op 1 Desember, toe die saak vir finale ondersoek uitgestel is. Vrydag is dit weer uitgestel om die staat kans te gee om te besluit of dit in die streekhof of die hooggeregshof aangehoor gaan word, sê sy regsverteenwoordiger, Adriaan van Rensburg.
Adoons is in Julie op borgtog van R2 000 vrygelaat. As deel van sy borgvoorwaardes mag hy nie met die ondersoek inmeng of staatsgetuies intimideer nie.
Hy moet ook elke Vrydag en Sondag by sy naaste polisiekantoor aanmeld.
Kamogelo is na bewering in Junie ná skool ontvoer deur mans wat hulle as polisiebeamptes voorgedoen het. Nadat hy deur die bestuurder van ’n Suzuki-voertuig opgelaai is, is hulle glo agtervolg en afgetrek naby Vereeniging-rylaan.
Voertuigsporing bevestig teenwoordigheid
Daniel Malebatso, die bestuurder wat vir een van Kamogelo se ouers werk, het getuig dat hy ’n sirene agter hulle gehoor het voordat ’n wit Toyota Hilux-dubbelkajuit, toegerus met blou ligte, hulle van die pad afgetrek het. Malebatso en Kamogelo is geskei. Hy is aangesê om alleen na die Parkweg-polisiekantoor te ry, maar die Toyota het verdwyn nadat ’n vragmotor tussen die twee voertuie ingery het.
Volgens die ondersoekbeampte, luitenant-kolonel Kelaotswe Lebodi, het ’n voertuigopsporingstoestel Adoons glo op die presiese plek geplaas waar Kamogelo laas gesien is. Lebodi het in Oktober tydens hofverrigtinge getuig dat die opsporingstegnologie dié inligting bevestig het.
Vyf ander verdagtes is ook in verband met die ontvoering in hegtenis geneem. Drie is by ’n huis in Kanana, Wepener, gearresteer, en twee op die pad tussen Kwetla en Wepener. Kamogelo is tydens hierdie operasie ongedeerd teruggevind.
• Het jy ’n nuuswenk om te deel? Bel of whatsapp die OFM Nuus-lyn: 066 487 1427.
