Die derde dag van die Bieliemieliefees op Reitz het begin met bulletjierugby en mininetbal. Altesaam 58 spanne van die Oos-Vrystaat neem hieraan deel. Die 35 netbalspanne en 23 rugbyspanne speel elk twee of drie wedstryde.

Die minisportpretdag het ’n spesiale betekenis, aangesien dit opgedra is aan twee jong leerders wat oorlede is.

Divan Terblanche. Foto: Facebook

Die minirugby is 'n bewusmakingsinisiatief vir “Hero Didi”, ter nagedagtenis aan Divan Terblanche (18) van Reitz, wat byna agt jaar gelede in ’n veldbrand dood is. Hy was besig om die brand saam met sy pa, Dieter, op hul familieplaas te bestry toe hy in September 2018 oorlede is.

Sophia en Olivia van Zyl. Foto: Charne van der Merwe

Die netbal is opgedra aan Carlie du Plessis (6) van Clocolan. Sy is op 17 Julie 2016 oorlede aan hondsdolheid.

Carlie du Plessis kon vlot Sotho praat en was baie lief vir die plaasdiere. Foto: Facebook

Hoewel die volledige veeprogram nie kon voortgaan nie weens bek-en-klouseer se beperkings, was daar beslis geen tekort aan dierevermaak nie.

Die vyf kamele was die gunsteling onder die opgewonde kinders. Hulle kon die ongewone diere van naderby bewonder en ook ’n kameelrit geniet – 'n ervaring wat baie nie gou sal vergeet nie.

Die kamele het ook tyd gemaak om vir foto's te poseer. Foto: Charne van der Merwe

Chantelle Janse van Vuuren, bestuurder van ’n plaas buite Magaliesburg waar die kamele woon, deel ’n paar feite. 

“Mense dink kamele het net vier bene, maar hulle het eintlik vyf. Die vyfde een sit onder hul bors en hulle rus daarop. “Wanneer die bulle op hitte is, ontwikkel hulle twee oliekolle op hul kop wat dit wys. 

“Wanneer die koeie gereed is, lig hulle hul stert op.” Al vyf die kamele is in Suid-Afrika gebore en is ware sterre. 

Jan Balt  en Cater Doman Reitz begin vroeg al oefen vir die Sterkman-kompetisie. Foto: Charne van der Merwe

Net voor die jaarlikse landboufees tot 'n einde kom, kan toeskouers steeds uitsien na die langverwagte Sterkman-kompetisie, waar krag en vasberadenheid tot die uiterste toets sal word, asook die perdryvertonings.

Ricus Nel, Die Piesangskille en DJ Crazy sal die aand op ’n hoë noot afsluit.

• Het jy ’n nuuswenk om te deel? Bel of whatsapp die OFM Nuus-lyn: 066 487 1427.

OFM Nuus/Charne van der Merwe dg