Die 64-jarige is Woensdag tuis in hegtenis geneem. Sy het na bewering iemand anders se bankkaart opgetel en dit gebruik vir aankope by verskeie winkels, sê sers. Palesa Thabana, provinsiale polisiewoordvoerder.

“Die slagoffer (65) het na bewering Dinsdag, terwyl hy tuis was, opgemerk dat iemand by vier verskillende winkels met sy kaart betaal het. Hy het toe besef dat sy bankkaart nie meer in sy besit was nie.”

Volgens Thabana het hy die volgende dag na die onderskeie winkels gegaan om navraag te doen oor die transaksies. “Die verdagte is na bewering op kring-TV-beeldmateriaal vasgelê terwyl sy betalings met die slagoffer se kaart maak.”

Vorige oortreding

Die saak is by die polisie aangemeld, waarna sy in hegtenis geneem is. Sy kom na verwagting ook binnekort weer voor nadat sy in Julie in hegtenis geneem is op aanklagte van poging tot moord, ontvoering en aanranding met die opset om ernstig te beseer.

Sy word as die hoofbeskuldigde beskou in ’n saak waar ’n bejaarde vrou na bewering in ’n versorgingsoord aangerand is. Vyf ander is saam met haar aangekla. Videobeeldmateriaal wys glo hoe die verdagte pille in die bejaarde se mond indwing, in haar gesig blaas, haar neus knyp en op haar spoeg nadat sy geweier het om die medikasie te neem.

Toe die bejaarde begin skree, het die verdagte na bewering met kleefband teruggekeer en dit om haar mond en kop gedraai. Die verdagte het na bewering ook die bejaarde met ’n kombers toegemaak, gesê niemand sou haar hoor nie, die ligte afgeskakel en die kamer verlaat.

Die verdagte is op borgtog van R5 000 vrygelaat onder streng voorwaardes, waaronder dat sy ten minste 100 m van die instelling af moet bly en haar paspoort moes indien.

Al ses in die sorgoordsaak moet weer op 30 Maart in die hof verskyn, wanneer ’n verhoordatum na verwagting vasgestel sal word.

• Het jy ’n nuuswenk om te deel? Bel of whatsapp die OFM Nuus-lyn: 066 487 1427.

OFM Nuus/Charne van der Merwe sm