Die Nasionale Verbruikerskommissie (NCC) het ’n onlangse wysiging aan die Wet op Verbruikersbeskerming (WVB) verwelkom. Dit is Woensdags (15/4) deur Parks Tau, minister van handel, nywerheid en mededinging, gepubliseer.

Een van die belangrikste veranderinge is die bekendstelling van ’n “Opt Out Registry”. Hierdie stelsel sal verbruikers toelaat om hul besonderhede te registreer om óf spesifieke bemarkers te blokkeer óf alle direkte bemarkingskommunikasie heeltemal te stop.

Alle direkte bemarkers moet registreer. Foto: iStock

“Die NCC sal hierdie register bestuur. Om die stelsel effektief te laat werk, sal alle direkte bemarkers vereis word om te registreer en aan die opgedateerde regulasies te voldoen. Hierdie regulasies stel ook fooie vir registrasie, hernuwing en data-opruiming uiteen, tesame met ander vereistes,” sê Phetho Ntaba, woordvoerder.

Ingevolge die gewysigde reëls moet direkte bemarkers hul kontaklyste opdateer en enige verbruikers wat uitgesluit het, verwyder voordat hulle bemarkingsboodskappe stuur. 

Die “Opt Out Registry” sal verbruikers meer beheer gee wat hulle toelaat om óf individuele bemarkers óf die hele bedryf te blokkeer.

Registrasie vir verbruikers en bemarkers sal in Julie open. Die NCC sal verdere besonderhede verskaf oor hoe om te registreer voordat die stelsel in werking tree.

Ntaba sê alle direkte bemarkers moet registreer om aan die WVB te voldoen. “Versuim om aan die regulasies te voldoen, sal ’n oortreding van die Wet op Verbruikersbeskerming wees en ’n administratiewe boete van tot R1 miljoen, of 10% van die direkte bemarker se jaarlikse omset (watter een ook al die meeste is), kan opgelê word. 

“Verbruikers is vir veels te lank blootgestel aan indringende en ongewenste direkte bemarkingskommunikasie. Die regulasies skep ’n robuuste manier om ongewenste oproepe te stop en te verseker verbruikers word beskerm,” sê Hardin Ratshisusu, waarnemende kommissaris van die Nasionale Verbruikersraad.

OFM Nuus dg

• Het jy ’n nuuswenk om te deel? Bel of whatsapp die OFM Nuus-lyn: 066 487 1427.