Om wildlewe te respekteer beteken om diere toe te laat om te leef waar hulle hoort – in die natuur, nie in hokke, agterplase of veilingswerwe nie. Te veel diere word uit die natuur gesteel en as troeteldiere aangehou of verkoop, sê Danelle Murray van Owl Rescue Centre.

’n Man van Vryburg is beboet en op waarskuwing vrygelaat nadat hy Vrydag (8/5) glo probeer het om twee jong blouape by ’n veiling te verkoop. Die diere, wat vermoedelik tussen ses maande en ’n jaar oud is, is na bewering teen R1 000 elk aangebied.

’n Medevrywilliger het Murray se organisasie om raad genader nadat sy die diere by die veiling opgemerk het. “Sy het voorgegee dat sy belangstel om die ape te koop terwyl sy vir die polisie gewag het, wat sy intussen in kennis gestel het, om op die toneel aan te kom. Sy het die man laat glo dat sy besig was om die geld te reël.”

Danelle met 'n uil. Foto verskaf

Die verdagte is deur Vryburg se honde-eenheid aangekeer en beboet vir die onwettige besit en poging tot verkoop van inheemse wildlewe.

Die geredde ape is sedertdien na ’n geregistreerde rehabilitasiesentrum oorgeplaas, waar hulle ’n proses van sosiale rehabilitasie sal ondergaan voordat hulle terug in ’n geskikte natuurlike habitat vrygelaat word.

Murray sê die apies is inheems aan Suid-Afrika en word beskerm onder die land se biodiversiteitswetgewing. Sy verduidelik dit is onwettig om inheemse wildlewe te vang, aan te hou, te verkoop of te verhandel sonder behoorlike magtiging.

Die apies is nou veilig by 'n sentrum. Foto verskaf

“Hierdie diere word uit die natuur gesteel. Mense dink dikwels hulle help deur hulle te koop om hulle te red, maar dit skep ’n mark. Die verkoper gaan eenvoudig terug, vang meer en hou aan om geld te maak.”

Sy sê jong diere word dikwels geteiken omdat hulle makliker is om te vang en te verkoop. “In sommige gevalle maak stropers volwasse diere dood om by hul babas uit te kom.”

Volgens Murray behels die onwettige handel in wildlewe baie ander spesies. Skilpaaie, uile en ape is van die algemeenste diere wat haar organisasie teëkom wat onwettig deur lede van die publiek aangehou word.

Brendan het ook 'n passie vir wilde diere. Foto verskaf

“Daar is ’n groot wanopvatting dat sommige van hierdie diere geskikte troeteldiere is. Wilde diere het baie spesifieke sosiale, dieet- en omgewingsbehoeftes. Dit is uiters moeilik om dit in gevangenskap te voorsien en dit is wreed om hulle in daardie soort lewe te dwing.”

Murray, wat 16 jaar gelede saam met haar man, Brendan, ’n wildreddings- en rehabilitasie-organisasie gestig het, sê hul werk fokus op die redding van beseerde of onwettig aangehoue diere, die rehabilitasie daarvan en die terugbring daarvan na die natuur.

Hul organisasie help ook met navorsing en die bestuur van mens-wildlewe-konflik, veral met betrekking tot spesies soos ape en bobbejane wat dikwels as oorlasdiere naby woongebiede beskou word.

Sy spoor mense aan wat wilde diere in nood teëkom, om hulle nie onnodig uit hul habitat te verwyder nie.

“As jy ’n skilpad vind wat die pad oorsteek, help dit eenvoudig veilig na die kant toe in die rigting waarin dit gegaan het. Moenie dit huis toe neem nie,” sê sy. “As jy iemand ken wat inheemse wildlewe onwettig aanhou, kontak ’n rehabilitasie-organisasie sodat die dier veilig na die natuur terugbesorg kan word.

“Dit is belangrik om wilde diere te respekteer en hulle die lewe te gee wat hulle bedoel is om te lei. Elke dier speel ’n rol in die natuur, en wanneer mense inmeng deur hulle te vang of aan te hou, versteur dit daardie balans,” sê Murray.

OFM Nuus/Charne van der Merwe sm

• Het jy ’n nuuswenk om te deel? Bel of whatsapp die OFM Nuuslyn: 066 487 1427.