Duisende kinders oor Suid-Afrika heen het die afgelope jaar slagoffers van mishandeling, verkragting en uitbuiting geword. Die polisie het 15 888 verdagtes in hegtenis geneem en 2 773 skuldigbevindings in sake van misdade teen kinders verseker.

Die polisie, in noue samewerking met verskeie belanghebbendes, gaan voort om sy stryd teen diegene wat kinders mishandel, uitbuit en benadeel, te versterk, sê lt. kol. Amanda van Wyk, Gautengse polisiewoordvoerder.

Kinderbeskermingsweek, met die tema Samewerking om Geweld teen Kinders te Beëindig, is van 29 Mei tot 5 Junie in Suid-Afrika aangebied.

Kinders word aangemoedig om ingeligte keuses te maak. Foto: iStock

Gedurende kinderbeskermingsmaand het wetstoepassingsagentskappe, regeringsdepartemente, burgerlike samelewingsorganisasies en gemeenskapstrukture bewusmakingsveldtogte, voorkomingsinisiatiewe en geteikende operasies uitgevoer wat daarop gemik was om kinders teen mishandeling, uitbuiting, verwaarlosing, handel en ander vorme van geweld te beskerm.

Die nasionale veldtog het uitgeloop op ’n dialoogsessie en leerderbetrokkenheidsprogram Saterdag (6/6) in Ntabankulu in die Oos-Kaap, waaraan meer as 300 leerders van plaaslike skole deelgeneem het, sê van Wyk.

Die geleentheid is gelei deur genl.maj. Mmantsheke Lekhele, nasionale afdelingshoof van die eenheid vir gesinsgeweld, kinderbeskerming en seksuele oortredings, asook senior polisiebeamptes, regeringsverteenwoordigers, gemeenskapsleiers en misdaadvoorkomingsbelanghebbendes.

Foto: ACT Africa

Die bespreking het gefokus op die gevolge van tienerswangerskap, die regsimplikasies van statutêre verkragting en die langtermyn-trefkrag van hierdie misdade op die lewe van jong mense.

Van Wyk sê leerders word aangemoedig om ingeligte keuses te maak, hulle teen mishandeling uit te spreek en misdaad aan te meld. Die belangrikheid van die skep van veilige omgewings waar kinders kan floreer, is ook beklemtoon.

Verskeie noemenswaardige skuldigbevindings en ondersoeke is uitgelig:

• In Gauteng het die Pretoria-Noord-landdroshof ’n stiefpa tot vyf lewenslange vonnisse en ’n bykomende 60 jaar gevangenisstraf gevonnis vir verkragting, seksuele aanranding, crimen injuria en die besit van kindermisbruikmateriaal wat ’n kind betrek wat 12 jaar oud was toe die misbruik begin het.
• In die Oos-Kaap het die FCS-eenheid in Humansdorp ’n 39-jarige man en ’n 44-jarige vrou in hegtenis geneem in verband met die beweerde verkragting van ’n kritiek siek sewejarige meisie nadat mediese personeel tekens van misbruik geïdentifiseer het terwyl sy behandeling in die hospitaal ontvang het.
• Die Wes-Kaapse Hooggeregshof het ’n pedofiel van Ceres tot vyf lewenslange vonnisse en ’n bykomende 78 jaar agter tralies gevonnis vir seksuele oortredings wat teen twee negejarige seuns en ’n 16-jarige meisie gepleeg is.
• In Limpopo het die Groblersdal-streekhof ’n 22-jarige man tot lewenslange gevangenisstraf gevonnis vir die verkragting van ’n 10-jarige meisie.
• In KwaZulu-Natal is ’n 36-jarige man tot lewenslange tronkstraf gevonnis nadat hy in 2021 skuldig bevind is aan die verkragting van sy 12-jarige buurvrou.
• In die Vrystaat het die Bloemfonteinse Streekshof ’n ma tot drie lewenslange vonnisse en 23 jaar tronkstraf gevonnis, en haar kêrel tot drie lewenslange vonnisse vir die seksuele misbruik van die vrou se twee dogters en niggie.

Ouers, versorgers, opvoeders en gemeenskappe word versoek om waaksaam te bly en enige vorm van kindermishandeling, verwaarlosing of uitbuiting aan te meld.

OFM Nuus

• Het jy ’n nuuswenk om te deel? Bel of whatsapp die OFM Nuus-lyn: 066 487 1427.