Zamani Saul, Noord-Kaapse premier, het die veranderinge aangekondig. Dit sluit in die verskuiwing van Bentley Vass na die portefeulje van paaie en openbare werke. “Dit lyk of die kabinetskommeling gemotiveerd is deur politieke binnegevegte eerder as ’n opregte poging om dienslewering te verbeter,” sê Isak Fritz, DA-woordvoerder in die Noord-Kaap.

Hy kritiseer Vass se verskuiwing teen die agtergrond van die provinsiale regering se hantering van munisipale bestuur en menslike nedersettings.

“Vass sal nou die voortgesette vandalisme en verwaarlosing van provinsiale infrastruktuurbates moet stop,” sê hy. Die DA het ook kommer uitgespreek oor die provinsie se R1 miljard-behuisingsprojek en beweer slegs 480 van die 6 500 huise wat aanvanklik belowe is, is teen Mei gelewer.Die huise is aanvanklik binne 12 maande belowe, maar 28 maande later is slegs net die 480 voltooi. Fritz sê kontrakteurs is bekommerd oor gebrekkige geotegniese verslae wat deur die departement uitgereik is. 

Die DA beweer dit het tot vertragings en stygende konstruksiekoste bygedra, terwyl beweerde volgehoue niebetaling van kontrakteurs sommige ondernemings finansieel in die moeilikheid gebring het.

“Hierdie bewerings is nie onafhanklik geverifieer nie en die provinsiale regering behoort die geleentheid te kry om daarop te reageer.”

Nodige verbeterings

Lebogang Motlhaping neem die menslike nedersettings se portefeulje oor nadat hy voorheen as ’n LUR in verskeie portefeuljes gedien het. Fritz bevraagteken of die verskuiwing die nodige verbeterings sal meebring.

“Van sport, vervoer, gesondheid en landbou het Motlhaping baie ervaring as LUR en min ervaring om effektief te wees,” sê hy. Newrene Klaaste verskuif na die landbouportefeulje met die DA wat haar versoek om voedselonsekerheid in landelike en arm gemeenskappe te prioritiseer.

Die party verwys na kommer wat die Socio-Economic Rights Institute of South Africa voorheen oor voedselonsekerheid in die Noord-Kaap uitgespreek het, ondanks die provinsie se belangrike rol in landbouproduksie.

Klaaste se vertrek laat ook ’n vakature vir die speaker van die Noord-Kaapse wetgewer. Die DA sê die proses om die pos te vul moet volgens die grondwetlike vereistes geskied.

Vir die opposisie kom die uiteindelike toets van die kabinetskommeling daarop neer of die veranderinge tot beter resultate vir inwoners sal lei.

“Ongeag wie waar dien is die ANC in die Noord-Kaap besig om vinnig te sink,” sê Fritz.

OFM Nuus dg

• Het jy ’n nuuswenk om te deel? Bel of whatsapp die OFM Nuus-lyn by 066 487 1427.