Melane Hamman hoop om haar ervaring te gebruik om samewerking tussen kunstenaars aan te moedig en die kreatiewe talent uit die stad en die land te bevorder. Sy wil dit wat sy geleer het na Bloemfontein bring en haar kennis met aspirant-kunstenaars by skole en universiteite deel en kreatiewe mense help om die vermaakbedryf beter te verstaan.

Hierdie Pan-Afrikaanse inisiatief bring jong kreatiewe mense van oral in Afrika en die diaspora byeen vir ’n maand lange reis waar storievertelling, kulturele diplomasie, jeuguitruiling en kontinentale voorspraak gekombineer word. Die uitdaging het op 1 September begin en 12 lande neem deel. 

View this post on Instagram

A post shared by Goshers (@_goshers)

Die finaliste is gekies nadat jong kreatiewe mense genooi is om ’n monoloog van een minuut in te dien wat handel oor temas soos identiteit, eenheid, handel, bemagtiging, bestuur en ’n gedeelde toekoms. Deelnemers gaan deur verskillende stadiums van die kompetisie, met deelnemers wat van tyd tot tyd uitgeskakel word voor die eindronde. Die topfinaliste woon vir 'n maand saam in die Pan-African House.

“Dit beteken so baie vir my om op daardie verhoog te staan en Suid-Afrika en Bloemfontein te verteenwoordig,” sê Hamman. “Dis 'n groot eer om al my mense te kan verteenwoordig. Mense onderskat Bloemfontein dikwels en dink daar is nie werklik iets besonders nie, maar ons het ongelooflik baie talent en ons moet dit bevorder.”

“Ek het as mens ongelooflik baie gegroei die afgelope twee weke in Ghana. Ek leer en groei so baie en wil nie hê dit moet eindig nie. Ek dink dit is so belangrik om iets aan die gemeenskap terug te gee. 

“Ek sou baie graag by skole en universiteite wou gaan praat. Elke stem, elke ‘like’ en elke opmerking kom werklik uit die hart, want ek sou nie hier gewees het sonder die ondersteuning van die mense van Bloemfontein en Suid-Afrika nie.”

“As kunstenaars moet ons bymekaar kom en ’n platform skep, saamwerk en mekaar soveel as moontlik help en ophef. Jy kan nie toelaat dat ander mense jou definieer deur hul menings of sosiale media nie.”

Hamman het in 2019 haar graad in drama en teaterkuns aan die Universiteit van die Vrystaat verwerf en werk as vryskutaktrise. Op die verhoog was sy in Woelige Willemien en haar maatjie Meraatjie, The Making en Pietie en Kosie: Die Towerstafdief te sien. Sy het ook die hoofrol van Gianna in die rolprent Repercussions vertolk en in ander rolprente en advertensies verskyn.

OFM Nuus/Zenande Mpame dg

• Het jy ’n nuuswenk om te deel? Bel of whatsapp die OFM Nuus-lyn by 066 487 1427.