Clarens tel onder Suid-Afrika se beste dorpies om in te woon en versterk sy reputasie as bestemming vir toerisme, kuns, avontuur en vernuwing. Die Vrystaatse dorp beklee die vyfde plek in Daily Maverick se Small Towns of the Year vir 2025, met ’n algehele telling van 87,8%, berig BusinessTech. 

Clarens is reeds bekend om sy berglandskap, kunsgalerye en ontspanne atmosfeer.

Die ranglys is gegrond op 2 069 benoemings van lesers wat landwyd ontvang is. Nege skrywers het die dorpe op die kortlys beoordeel op grond van netheid, munisipale bestuur, gemeenskapsgees, veiligheid, natuur, gesinsvriendelikheid en konnektiwiteit.

Clarens behaal 100% vir gesinsvriendelikheid en 90% vir veiligheid, natuur-omgewing en konnektiwiteit. Die dorp kry 88% vir netheid en 80% elk vir munisipale bestuur en gemeenskapsgees.

Clarens is in 1912 gestig en lê aan die Malutiberge. Die dorp het oor die jare ’n sterk toerisme-ekonomie ontwikkel, ondersteun deur verblyf, restaurante, buitelugaktiwiteite en ’n lewendige kunsgemeenskap.

Eskom het in 2024 ook ’n proefprojek aangekondig waardeur inwoners en ondernemings hul elektrisiteitsvraag gesamentlik deur groepbeperkings kan bestuur. Die stelsel monitor kragverbruik by die dorp se hoofvoedingspunt en stel gebruikers in staat om vraag intyds te verminder.

Slimmeters en laaipunte vir elektriese voertuie is reeds as deel van Clarens se groter slimdorp-inisiatiewe aangebring, sê Eskom.

Clarens is veral bekend om sy kunstenaars en galerye. Die dorp het sowat 20 permanente kunsgalerye waar Suid-Afrikaanse kunstenaars gereeld om die beurt kan uitstal. Dié kunsprofiel dra ook by tot die jaarlikse Clarens-kunstefees, wat vanjaar sowat 5 000 mense gelok het.

Ander gewilde geleenthede sluit in ’n handwerkbierfees, ’n kersiefees en ’n liggiefees. 

Die dorp se groeiende gewildheid vorm boonop deel van ’n breër toerisme-aanbod in die Oos-Vrystaat. Die nabygeleë Golden Gate Hoogland Nasionale Park het sy aantreklikhede uitgebrei met die Golden Gate Zipline.

Die foefieslaai bestaan uit sewe kabels, waarvan die langste oor 650 m strek, en bied aan besoekers ’n adrenalienbelaaide manier om die park se natuurskoon te beleef.

Die glykabel sluit aan by die Kgodumodumo-dinosourusinterpretasiesentrum, wat sedert sy opening in Junie verlede jaar ook druk besoek word. Die R120 miljoen-Sanparke-sentrum ontvang reeds meer as 80 000 besoekers en het sedert Oktober meer as R1 miljoen verdien.

Die meeste besoekers kom uit die Vrystaat, Gauteng en KwaZulu-Natal. Die sentrum dra terselfdertyd by tot beter besetting van verblyf in die omgewing en skep nuwe geleenthede vir plaaslike ondernemings en inwoners.

OFM Nuus cvs

• Het jy ’n nuuswenk om te deel? Skakel of whatsapp die OFM Nuus-lyn 066 487 1427.