On Now
Weekdays 23:00 - 23:59
Overnight Oscar
NEXT: N/A N/A with N/A
Listen Live Streams

Health

Handhaaf ’n gesonde gewigstoename tydens swangerskap

───   CHARNÉ VAN DER MERWE 12:53 Fri, 10 May 2024

Handhaaf ’n gesonde gewigstoename tydens swangerskap | News Article
Foto: Pulsetoday

“Swangerskap beteken nie dat jy nou jou voedselinname moet verdubbel nie.”

Swangerskap is ’n reis gevul met vreugde en veranderinge, maar gewigstoename is ’n onderwerp wat dikwels opduik. Maar hoeveel gewig kan ’n gesonde vrou tydens swangerskap aansit, en watter faktore moet oorweeg word vir ’n veilige en gesonde swangerskap? 

OFM Nuus het met dr. Chantelle van der Bijl, op sosiale media ook bekend as Bloem MomDoc, hieroor gepraat.

“Eerstens, laat ons ’n algemene mite aanspreek: die idee van ‘eet vir twee’. Swangerskap beteken nie dat jy nou jou voedselinname moet verdubbel nie. In plaas daarvan vind fisiologiese gewigstoename plaas, wat verskeie komponente insluit soos die baba se gewig, verhoogde bloedvolume, liggaamsvloeistowwe, en meer. Hierdie komponente dra by tot ’n gemiddelde gewigstoename van ongeveer 11 kilogram gedurende swangerskap, hoewel dit kan verskil.”

Swanger vroue se gewig kan met minstens 11 kilogram toeneem. Foto: blogspot

Van der Bijl sê die bepaling van jou liggaamsmassaindeks (LMI) voor swangerskap dien as ’n stap om doelwitte vir gesonde gewigstoename te verstaan. LMI, bereken met behulp van lengte en gewig, klassifiseer individue in ondergewig, normale gewig, oorgewig en vetsugtige groepe.

Gegrond op hierdie klassifikasies, verskaf die Instituut vir Geneeskunde (IOM) aanbevole gewigstoenamereekse wat aangepas is vir voorswangerskap BMI en of ’n vrou een baba of ’n tweeling verwag.

Sy verduidelik dat gewigstoename nie net gaan oor die syfers op die skaal nie; dit gaan ook oor die versagting van risiko’s wat verband hou met oormatige of onvoldoende gewigstoename.

‘Onvoldoende gewigstoename hou risiko’s in vir ondergewigbabas’

“Om te veel gewig op te tel tydens swangerskap kan lei tot komplikasies soos groter as verwagte babas, verhoogde waarskynlikheid van ’n keisersnit en verhoogde risiko’s van swangerskapverwante toestande soos hoë bloeddruk en diabetes. Omgekeerd hou onvoldoende gewigstoename risiko’s in vir ondergewigbabas en ’n groter waarskynlikheid van premature geboorte.”

Sy sê om ’n gesonde gewig voor swangerskap te handhaaf, lê ’n goeie grondslag vir ’n suksesvolle swangerskap. “Navorsing wys dat gewig voor swangerskap ’n beduidende invloed op swangerskapuitkomste het, wat die belangrikheid beklemtoon om algehele gesondheid voor swangerskap te priotiseer.”

Dit is belangrik om ’n gesonde gewig te handhaaf. Foto: beingtheparent 

Voeding speel ’n groot rol in die ondersteuning van die ma en baba se welstand. “Hoewel spesifieke dieetaanbevelings verskil kan ”n dieetkundige persoonlike leiding gee oor die handhawing van ’n gebalanseerde dieet. Om fisiek aktief te bly, indien dit veilig is, kan ook help om gewigstoename te bestuur.”

Van der Bijl sê sy weet ma’s is baie gretig om ná ’n swangerskap gewig af te skud, maar dat dit noodsaaklik is om gewigsverlies met baie geduld aan te pak. “Vermy kitsdiëte wat die gesondheid van ma’s en babas kan benadeel, veral tydens borsvoeding. Fokus eerder op ’n gebalanseerde dieet en gereelde oefening. Dit is meer volhoubaar en prakties ná ’n swangerskap.”

OFM Nuus dg/mvh

@ 2024 OFM - All rights reserved Disclaimer | Privacy Policy | We Use Cookies - OFM is a division of Central Media Group (PTY) LTD.