Baie jong paartjies wat hulself vir die huwelik gespaar het, beleef ’n moeilike en hartseer wittebrood omdat daar fisiese, mediese en selfs sielkundige redes kan wees waarom intimiteit só pynlik is dat dit byna onmoontlik raak.

Fisiese obstruksies, soos ’n verdikte maagdevlies, of mediese toestande soos endometriose, kan erge pyn veroorsaak. Om ’n dokter of ginekoloog te raadpleeg is die beste eerste stap.

’n Toestand soos vaginisme kan ook ’n groot rol speel. Om die probleem te ignoreer of bloot te probeer voortgaan, kan dit vererger. Met die regte mediese en/of sielkundige ondersteuning kan die onderliggende oorsaak egter opgelos en behandel word.