Staat appelleer teen Griekwastad-borguitspraak
06:08 Tue, 04 Sep 2012
Staat appelleer teen Griekwastad-borguitspraak | News Article
Mariné Jacobs

Griekwastad - OFM het verneem dat die staat gaan appelleer teen die borguitspraak van die minderjarige wat Maandag in die Griekwastad-landdroshof gehoor is.

Regter Spiwo Mazwi het borg van R5 000 toegestaan aan die 16-jarige seun en hom in die sorg van sy voog vrygelaat.

Nadat die staatsaanklaer JJ Cloete met die direkteur van Openbare Vervolging Maandag vergader het, het hulle besluit om teen die uitspraak te appelleer.

Die seun word beskuldig van die moorde op Deon, Christelle en Marthella Steenkamp wat in April vanjaar in die gesin se plaashuis doodgeskiet is.

Mazwi het Maandag gesê dat die belange en beskerming van die minderjarige kind die meeste gewig moet dra.

Nadat die borg toegestaan is, het die seun sy familie en vriende in die hof omhels.

Gemeenskapslede wat buite die hof saamgedrom het, het hul ontevredenheid met die uitspraak teenoor die media uitgespreek en baie het gesê dat die seun 'n gevaar vir die samelewing is.

Cookies help us deliver our services. By using our site, you agree to our use of cookies. Tell me more