Voëlgriep is ’n groep A virussiekte wat by veral hoenderagtige voëls voorkom. Dit is dodelik vir hoenders en kalkoene. Loopvoëls soos volstruise loop ook die gevaar om besmet te word.

Dié virale infeksie kan wel ’n bedreiging vir openbare gesondheid onder mense inhou.

Die tydskrif BOERhier berig dat uitbreking van voëlgriep by boerderye waarskynlik veroorsaak word deur die ontlasting van trekvoëls wat oor die plase vlieg. Verspreiding deur eiers is ook moontlik, maar gewoonlik slegs weens mis wat aan die eiers kleef.

Experts warn H5N1 bird flu virus is changing rapidly in largest ever outbreak:

Last week Chile ???? said that nearly 9,000 sea lions, penguins, otters, porpoises and dolphins had died from bird flu along its north coast since the start of the year. pic.twitter.com/zZ0rf3Xzwt

— Infectious Disease Tracker (@HmpxvT) June 3, 2023

Die laboratoriumgroep Lancet sê die siekte presenteer by pluimvee in ligte vorm as deurmekaar vere, verminderde eierproduksie of asemhalingsprobleme soos nies en proes.

FNB senior landbou-ekonoom Paul Makube bevestig die uitbreking van voëlgriep is tot die Wes-Kaap beperk. Indien die siekte verder versprei, sal handel ontwrig word en eierprodusente kan noemenswaardige verliese ly. ’n Moontlike prysstyging van eiers kan verwag word, omdat produksie sal afneem.

Makube sê eierprodusente sukkel ook weens wisselvallige elektrisiteit, verhoogde kragkoste en ’n vervalle padinfrastruktuur. 

Die Suid-Afrikaanse Pluimveevereniging se hoofbestuurder, dr. Abongile Balarane, is van mening dat inenting die beste manier is om voëlgriep in die eierbedryf te bekamp. Dié bedryf het reeds in beginsel besluit om inenting te ondersteun.

Die eienaar van El Azaar pluimveeplaas naby Bloemfontein, Marco Torsius, sê geen voëlgriepgevalle is tot dusver in die Vrystaat aangemeld nie. Hy vra egter dat hoendereienaars die nodige voorsorgmaatreëls moet tref om die situasie te handhaaf.

OFM Nuus/Elsabé de Jager