“Nampo Alfa se interraskampioenskap is ’n baie goeie inisiatief en gesond vir die bedryf. ’n Bietjie gesonde kompetisie is mos ’n goeie ding.”

Só praat Peter Abrahamse, eienaar van die River Valley Simmentalerstoetery buite Heidelberg in Gauteng. Die stoetery se spogkoei, Venus, is genooi om eersdaags aan Nampo Alfa se interraskompetisie in Bothaville deel te neem.

“Venus is ’n baie mooi koei,” sê Abrahamse. “Sy is struktureel korrek, met 'n goeie wig en uier. 'n Stoetkoei moet baie, baie vroulik wees, en dit is wat Venus is.”

Venus het in Junie vanjaar die goue trofee as die opperste kampioen-vleiskoei op die Royal-landbouvereniging se skou in Pietermaritzburg verower.  “Sy is in 2018 gebore en is nog ’n redelike jong koei. Sy het al vier keer gekalf, waaronder twee stelle tweelinge. Sy is ’n buitengewoon vrugbare koei.”

Die Nampo Alfa-lewendehawe-, jag en buitelewe-ekspo vind van 12 tot 14 Oktober by Nampopark buite Bothaville plaas. Een van die hoogtepunte is die internasionale interraskampioenskap wat vir die eerste keer sedert 2019 weer ter plaatse gehou word.

Koeie en bulle van agt van die beste vleisbeestelers in die land ding mee vir die titel van nasionale interraskampioen. Hulle is gekies nadat hulle as kampioene by Suid-Afrika se grootste landbouskoue, naamlik Hertzogville, Bloemskou, Vryburg, Nampo, Royal-skou, Thabazimbi, Ellisras, Ermelo, Noord-Gauteng, George, Moorreesburg, Parys en Standerton, aangewys is.

OFM Nuus/Christine van der Westhuizen