“Eerstens en bowenal is Nampo ’n handelskou. 

“Ons is hier om oor tegnologie te praat, hoe ons boer, watter trekkers die beste is, watter variëteite daar is en om dit met mekaar te deel,” sê dr. Tobias Doyer, uitvoerende hoof van Graan SA tydens die amptelike opening. “Ons het weggetrek, alles is in orde, al die trekkers blink en al die tegnologie word uitgestal.

Ds. Laurie Naudé het ’n oordenking by die Muur van Herinnering gelei. Foto: Elzette Boucher-Kruger

“Ons begin egter elke jaar hier by die Muur van Herinnering om diegene wat ons vooruitgegaan het, te herdenk. Ons moet onthou dat ons uit God se Genade leef en dat boerdery, selfs op verskillende maniere, ’n gevaarlike beroep is - vir al die boere en arbeiders.

Die gedenkmuur “is ’n moeilike plek om te begin, maar dit gee ons ook die realisme, die hoop, die passie, die positiwiteit om uit te gaan, die tegnologie te bestudeer, goeie tye te hê en ’n bietjie pannekoek saam met goeie vriende te eet. 

Dr. Tobias Doyer, uitvoerende hoof van Graan SA tydens die amptelike opening. Video: Elzette Boucher-Kruger

“Kom kyk na die uitstallings en deel die ontsag, die onmeetbaarheid en die skaal van wat ons hier het met jou mede-boere. 

“Wat ’n plek om te wees! Dit sal wonderlik wees om almal hier te sien. Wat ’n wonderlike week lê voor?!”

In 1998 het die Hennenman Boerevereniging die inisiatief van stapel gestuur om ’n gedenkmuur op te rig wat ten doel het om ’n versamelpunt vir name van slagoffers van plaasaanvalle te wees.

“Gee ons krag vir die toekoms.” Foto: Elzette Boucher-Kruger

Hierdie gedenkmuur is ’n monument ter nagedagtenis aan die produsente en hul families wat sedert 31 Mei 1961 in plaasaanvalle dood is.

Die monument bestaan uit drie regop kolomme, wat ’n man, vrou en kind voorstel, omdat boere en hul gesinne gereeld saam in plaasaanvalle vermoor word. Die kolomme is onderskeidelik 14 m, 10 m en 5 m hoog. 

Rondom die kolomme staan nege herinneringsmure, vier aan die linkerkant en vyf aan die regterkant. Dié nege mure stel elk ’n provinsie in die land voor, en dit is op dié mure waarop die name van die vermoordes gegrafeer word.

Die gedenksteen. Foto: Elzette Boucher-Kruger

Die monument is amptelik op 7 Maart 2002 bekend gestel. Die argitek was Freek du Plessis en die beeldhouer was Phil Minnaar.

Om aan te pas by die sosialemediatendens, is ’n Facebook-bladsy, Muur van Herinnering, ook opgestel waarby ondersteuners van dié waardige saak kan aansluit. Besonderhede kan ook hier aangebring word.

OFM Agri mvh