Dr Frikkie Maré, hoof- uitvoerende beampte, het gevra marktoegang moenie verder beperk word nie, aangesien die ekonomiese impak groot is – produsente wat net een of twee betalings per jaar ontvang, loop ’n beduidende risiko as hulle tydens kwarantyn hul inkomste verloor. 

Hy noem as voorbeeld die situasie in KwaZulu-Natal, waar uitgespreide siektebeheer net voor ’n kritiese tydperiode plaasgevind het, wat baie produsente nou in ’n finansiële doodloopstraat is. “Die feit van die saak is dat baie produsente wat tans onder kwarantyn is, nie hierdie krisis gaan oorleef nie.”

Verder het hy beklemtoon hoewel sommige rolspelers die regulasies nakom, ander – insluitend regeringsinstansies – onverantwoordelik optree, wat die implementering van wetgewing in die waardeketting ondermyn. 

Hy vra vir praktiese, implementeerbare regulasies en ’n nasionale bloudruk, gevolg deur ooreenstemmende opleiding in alle provinsies om verskille te verminder en wetstoepassing te verseker.

“Indien ons nie kan verseker dat die regulasies deur alle rolspelers in die waardeketting gevolg word nie, is die regulasies tevergeefs.”

Wat die omheiningswet en die beheer van rondloperdiere betref, meen hy bestaande maatreëls is ontoereikend. Selfs met biosekuriteitsmaatreëls kan rondloperdiere langs heinings die hele stelsel ondermyn.

“Kommersiële produsente leef letterlik in vrees, aangesien baie van hulle besef dat hul boerderydae getel is indien hulle onder kwarantyn geplaas word onder die huidige riglyne.” 

Dr Maré het die hoop uitgespreek dat daar tydens die Indaba oplossings vir voortgesette marktoegang, deeglike regulasies, ’n nasionale bestuursmodel en gelyke behandeling van alle rolspelers bereik word.  

OFM Agri/Verklaring mvh