“Die gevolg as vee nie behoorlik gemerk is nie, is eienaarskap kan nie bewys word nie en sodoende kan vee verloor word. Ons verskaf ook die toerusting waarmee brandmerke gedoen word,” sê HE Steyn van BrandmerkSA.

“Ons het baie stoetkliënte wat by hulle rasgenootskap ’n merk registreer; dit is baie keer saamgestel uit ’n logo of kombinasie van getalle. Jou rasgenootskap gee vir jou die merk en daarmee merk jy dan jou stoetvee.  

“Die merk stem nie altyd ooreen met die departement van landbou se registrasie-stelsel nie. Stoetkliënte kry twee merke, die merk van die rasgenootskap en die een van die landboudepartement.

“Albei merke moet gebruik word om seker te maak alles is geregistreer en jy kan jou vee dan opspoor daarmee,” sê Steyn.

Brandmerke van persone wat te sterwe gekom het, mag nie gebruik word nie; dit kan wel oorgedra word. Brandmerke kan vir grootvee gebruik word en kleinvee kry tatoeërmerke. Dieselfde merk word gebruik; die toediening verskil.

Brandmerke van persone wat te sterwe kom, kan moeitevry oorgedra word. Foto: BrandmerkSA

“BrandmerkSA kan die oordragte van brandmerke hanteer wat uit boedels oorgedra word. Die heruitreiking van sertifikate kan ook deur ons gedoen word en die hele proses word moeiteloos deur ons gehanteer.”

Nog inligting is beskikbaar op die onderneming se webtuiste.

• Deel jou landbounuus: agri@ofm.co.za.

OFM Agri/Isabel van Tonder