Suid-Afrikaanse graanprodusente vra vir billike en deursigtige sojaboonprysontdekking. “Die produsente het hul standpunt op ‘n vreedsame maar ferm wyse duidelik gestel,” sê Richard Krige, voorsitter van Graan SA. 

“Dit gaan nie net oor een verwysingspunt nie. Dit gaan daaroor of die stelsel die werklikhede van die fisieke mark weerspieël en of produsente vertroue kan hê dat besluite wat hul besighede raak, op deursigtige bewyse gegrond is.” 

Deelnemers aan die optog het ook mieliemeel vir liefdadigheid geskenk. Foto: Graan SA

Die petisie wat deur 965 handtekeninge en 511 ondersteunende kommentare gesteun is, doen ‘n beroep op die JSE om sy besluit te heroorweeg, ‘n deursigtige en bewysgegronde hersiening te doen, en ‘n prysontdekkingstelsel te aanvaar wat werklike graanbewegings en fisieke markwerklikhede beter weerspieël.

Die besluit om die meervoudige verwysingspuntmodel te verwerp sonder voldoende kwantitatiewe bewyse is ‘n groot bekommernis vir Graan SA.

Metodologie

“Ons standpunt bly die metodologie moet weerspieël waar graan geproduseer word, waar die vraag bestaan en hoe graan werklik deur die mark beweeg,” sê Tobias Doyer, uitvoerende hoof van Graan SA. 

“Onnodige doeltreffendheid skep uiteindelike koste êrens in die waardeketting.”

Die oorhandiging en petisie bring nie Graan SA se optrede tot 'n einde nie. Foto: Graan SA

Deelnemers aan die optog het ook sakke mieliemeel gedra as ‘n simboliese herinnering dat volhoubare primêre produksie uiteindelik voedselsekerheid onderlê. Die mieliemeel is ná afloop van die geleentheid aan liefdadigheidsorganisasies geskenk.

Die oorhandiging van die petisie en ondersteunende kommentare bring nie Graan SA se optrede oor die aangeleentheid tot ‘n einde nie.

Graan SA gaan voort met sy tegniese voorleggings en skakeling en ook met regstappe, insluitend ‘n dringende aansoek wat daarop gemik is om die inwerkingstelling van die besluit te voorkom, terwyl die aangeleentheid deur toepaslike prosesse betwis word.

Die doel van die prosesse is om produsentebelange te beskerm en ‘n meer doeltreffende en deursigtige uitkoms te verseker. 

OFM Agri dg

• Deel jou landbounuus: agri@ofm.co.za.