Vrystaat Landbou het die forum aangekondig as ’n direkte skakel met primêre rooivleisprodusente wat grondvlakprobleme vroeër moet identifiseer, produsente se stem versterk, bedryfsinligting vinniger versprei en samewerking bevorder. Die doel is om uiteindelik ’n meer volhoubare en winsgewende rooivleisbedryf te ondersteun.

RPO Vrystaat steun in beginsel enige bona fide-inisiatief wat produsente se belange bevorder, maar sê die forum is sonder voorafgaande beraadslaging met bestaande rolspelers aangekondig. Die organisasie meen konsultasie behoort die vertrekpunt te wees wanneer nuwe strukture in ’n reeds gevestigde bedryf geskep word.

TLU SA deel dié kommer. Skakelbeampte Zelda Brits sê die organisasie is bekommerd dat die forum bestaande verteenwoordiging binne die rooivleisbedryf kan verswak en verdere verdeeldheid kan veroorsaak. TLU SA meen produsente behoort eerder bestaande kommoditeitsorganisasies te versterk, aktief deel te neem en hul leiers aanspreeklik te hou.

Beeste op Nampo Alfa. Foto: Nampo Alfa

RPO Vrystaat is in 1982 deur produsente gestig en sê sy verteenwoordigende struktuur bestaan uit produsente uit 20 streke. Dié netwerk is volgens die organisasie verweef met plaaslike boereverenigings en landbou-unies, wat ook deel vorm van Vrystaat Landbou se verteenwoordigende grondslag.

Die organisasie waarsku dat enige nuwe forum duidelik moet wys watter toegevoegde waarde dit bied. Parallelle strukture kan onnodige koste en administratiewe laste skep indien bestaande rolle en kundigheid bloot gedupliseer word.

TLU SA wil intussen met Vrystaat Landbou in gesprek tree om duidelikheid oor die forum se doelwitte en sy verhouding met die bestaande Rooivleisprodusente-organisasie te kry. Brits sê die bedryf kan nie verdere versplintering bekostig nie en dat produsente se belange voorop moet staan.

RPO Vrystaat sê hy het reeds die afgelope maande pogings aangewend om gesprek en samewerking met Vrystaat Landbou te bevorder. Hy bly bereid om met die nuwe forum, Vrystaat Landbou en ander relevante landbou-organisasies saam te werk waar dit produsente kan bevoordeel.

Die debat kom terwyl rooivleisprodusente reeds onder groot finansiële druk verkeer. RPO Vrystaat wys op marktoegang, bek-en-klouseer en ander bedryfsuitdagings wat ondernemings se winsgewendheid en volhoubaarheid raak.

Die volgende stap sal waarskynlik wees om duidelikheid te kry oor hoe die forum binne bestaande strukture gaan funksioneer, watter probleme dit self sal hanteer en waar samewerking moontlik is. RPO Vrystaat sowel as TLU SA beklemtoon dat nuwe strukture uiteindelik aan praktiese voordele vir produsente gemeet moet word.

OFM Agri cvs

• Deel jou landbounuus: agri@ofm.co.za.