Louw van Reenen, voorsitter van die Beefmaster Group, is by Business for South Africa (B4SA) aangestel, waar hy saam met ander bedryfsleiers die landbou se belange sal verteenwoordig. Die aanstelling kom terwyl landbou en landbouverwerking as belangrike dryfvere vir ekonomiese groei in die vennootskap ingesluit word.

Die regering en die sakewêreld wil in die derde fase van hul vennootskap beleggings aanmoedig, produksie uitbrei en ondernemingsvertroue versterk. Die mikpunt is om Suid-Afrika se jaarlikse ekonomiese groei tot meer as 3% te verhoog en teen 2030 tot die skepping van ’n miljoen bykomende werksgeleenthede by te dra.

Van Reenen sê hy het vertroue in die samewerking omdat dit die kundigheid, vaardighede en vermoë kan ontsluit wat nodig is om die ekonomie te laat groei. Volgens hom bestaan daar aansienlike geleenthede vir verskeie bedrywe, waaronder die beesvleisbedryf, hoewel dit tyd kan neem voordat sommige voordele sigbaar word.

‘Groei van meer as 3% per jaar is nodig om werk op ’n groter skaal te skep en nuwe toetreders 
tot die arbeidsmark te absorbeer’

Pres. Cyril Ramaphosa het die derde fase van die vennootskap begin teen die agtergrond van aanhoudend hoë werkloosheid en beperkte ekonomiese groei. Volgens die presidensie was 8,5 miljoen mense sonder werk, terwyl sowat 300 000 nuwe werksoekers jaarliks tot die arbeidsmag toetree.

Die Suid-Afrikaanse ekonomie het in 2025 met 1,1% gegroei, terwyl die werkloosheidskoers volgens die presidensie op 33,6% staan. Die vennootskap meen groei van meer as 3% per jaar is nodig om werk op ’n groter skaal te skep en nuwe toetreders tot die arbeidsmark te absorbeer.

Die nuwe fase bou voort op die samewerking wat in 2023 begin het. Die eerste twee fases het onder meer aandag gegee aan elektrisiteitsvoorsiening, vervoer en logistiek, misdaad en korrupsie, en jeugwerkloosheid. Dié werkterreine bly belangrik omdat ondernemings betroubare infrastruktuur en ’n gunstige bedryfsomgewing nodig het.

Vier sektore kry nou besondere aandag as moontlike bronne van groei: mynbou, toerisme, infrastruktuur en landbou en landbouverwerking. Volgens die presidensie is hulle gekies weens hul vermoë om beleggings te lok, produksie te vergroot en werk te skep, ook vir jong mense en minder geskoolde werknemers.

Die vennootskap wil verder aandag gee aan probleme in plaaslike regering en voortgaan met werk teen misdaad en korrupsie. Die presidensie beklemtoon ondernemingsvertroue hang nie alleen van ekonomiese hervormings af nie, maar ook van veilige gemeenskappe, geloofwaardige instellings en doeltreffende openbare dienste. Ook uitvoerende hoofde en toegewyde implementeringspanne sal aan die werkstrome deelneem om oplossings te versnel.

Meer besonderhede oor die planne en meetbare doelwitte vir elke werkterrein word in die vierde kwartaal van 2026 verwag. Die regering en sakeleiers sal die vordering tydens kwartaallikse vergaderings met die president bespreek en daaroor aan die publiek verslag doen.

OFM Agri sm

• Deel jou landbounuus: agri@ofm.co.za.