’n Man het dekades gelede vermis geraak, net om weer uit die niet te verskyn met geen herinnering van enigiets wat met hom gebeur het nie.

Vasile Gorgos is ’n Roemeense veeboer en het gereeld uitstappies onderneem om sy beeste te verkoop. Die boer (nou 95) sou gereeld sy familie kontak terwyl hy op hierdie reise was. Dertig jaar gelede het Vasile, oënskynlik soos gewoonlik, in die pad geval en eenvoudig spoorloos verdwyn.

Vasile het in 1991 weggeraak, maar die raaisel van wat op aarde met hom gebeur het, bly onopgelos. Hy het geen herinnering van wat eintlik met hom gebeur het terwyl hy weg was nie. Hy beweer selfs dat hy die hele tyd tuis was.

Vasile se familie is polisie toe ná sy verdwyning, en ’n soektog is van stapel gestuur wat uiteindelik vrugteloos was. Aangesien die weke maande geword het, het sy familie aangeneem dat Vasile gesterf het. ’n Aantal gedenkdienste is vir hom gehou.

Lees ook: Weird Wide Web – TikTok-raaisel verwar sosialemediagebruikers!

Toe, in September 2021, maak Vasile eenvoudig sy opwagting by hul plaashek, skynbaar uit die niet. Vasile het presies dieselfde klere gedra as toe hy verdwyn het en daar was selfs ’n treinkaartjie in sy sak van die dag waarop hy verdwyn het.

Ná sy herverskyning is ’n motor opgemerk wat wegjaag, te gou om die nommerplaat te sien.

Met sy terugkeer het getuies gesê dat hy verward is, maar andersins gesond blyk te wees. Ná mediese ondersoeke het dokters bevestig dat Vasile gesond is, ten spyte van sommige neurologiese probleme wat algemeen is vir sy ouderdom.

Luidens berigte het hy gesê hy kon onthou dat hy in 1928 gebore is, dat sy vrou gesterf het en sy pa ’n beroemde handelaar was. Maar hy het gesukkel om sy seun en dogter te herken.

Sy seun het gesê hy het eers nie sy pa herken nie, en het aan plaaslike media gesê hy begryp nie wat gebeur het nie. “Ons verstaan hom nie. Hy weet nie wat hy sê nie,” het hy gesê. 

“Hy praat met ons oor die tydperk toe hy betrokke was by die grootmaak en verkoop van koeie. Ons vra hom een ding, en hy sê vir ons iets anders.

“Wie weet waar hy was, wie hom aangehou het, miskien was hy gedwing om te werk … wie weet watter soort lewe hy gelei het?”

Die familie vra enigiemand met inligting oor wat met Vasile gebeur het om asseblief na vore te kom.

Lees meer

OFM Nuus mvh