Ons ken almal die probleem. Jy maak ’n pakkie aartappelskyfies oop, eet een, dan nog een, en voor jy jou oë uitvee, sit jy op die rusbank met tien heerlik sout skyfies in jou maag en tien ongelooflik vetterige vingerpunte. 

Jy kan jou vingers aflek, na ’n servet gryp of opstaan en jou hande was. Maar blykbaar is daar nou ’n vierde opsie: Om jou vinger in ’n wasmasjien te was.

Ja, werklik.

Lay’s, een van die wêreld se grootste handelsmerke vir aartappelskyfies, het ’n miniatuurwasmasjien bekendgestel wat spesifiek ontwerp is om vetterige vingerpunte skoon te maak nadat ’n mens skyfies geëet het. En eerlikwaar, daar is talle vrae oor hierdie ongewone uitvinding. Wie het na ’n vetterige vinger – vol skyfiekrummels – gekyk en gedink: “Weet jy wat dié probleem sal oplos? ’n Wasmasjien”.

Die slim deel is dat die toestelletjie net soos ’n tradisionele wasmasjien lyk, kompleet met sy eie klein wasgoeddeurtjie. Om dit te gebruik skakel jy dit eenvoudig aan, steek jou vetterige vingerpunt deur die deur en laat die masjien die res doen.

Wanneer die masjien jou vinger bespeur, spuit ’n induksiestelsel ’n fyn mis alkohol daarop om die vetterige oorblyfsel te verwyder. Die alkohol word in ’n hervulbare tenk aan die onderkant van die masjien geberg. Dit is dus in wese ’n wasmasjien, maar in plaas daarvan om sokkies, onderklere of daardie T-hemp wat jy al lank vermy om te was, skoon te maak, was dit net een vinger.

Die miniatuurmasjien is slegs 15 cm hoog en 11 cm breed en dit het selfs ’n USB-tipe-C-laaipoort. Want, natuurlik, as jy ’n futuristiese wasmasjien vir skyfie-vingers gaan besit, moet dit via USB-C kan laai. Die bisarre toestel het onlangs op Japannese sosiale media ’n opskudding veroorsaak; mense sê hulle sal graag een wil hê as ’n nuwigheid, ’n versamelaarsitem of bloot omdat dit – wel – belaglik is.

Lees ook: Weird Wide Web – Een T-hemp. 30 dae. Geen wasgoed nie!

Ongelukkig kan jy nie sommer aanlyn gaan en een bestel nie. Slegs vyf van hierdie klein masjiene word vervaardig, en in plaas daarvan dat dit kommersieel verkoop word, word dit deur middel van ’n spesiale lotery weggegee. Dit is ook onduidelik of mense buite Japan in aanmerking kom om deel te neem. 

Die grootste ironie van alles is dalk dat die masjien ontwerp is om jou die moeite te spaar om van die rusbank af op te staan om jou hande te was, maar dat jy eindelik steeds sal moet opstaan om die res van jou hand te was.

Wel, daar het jy dit. Die mensdom het amptelik 'n miniatuur-wasmasjien vir ons vingers uitgevind. Teen hierdie tempo kan die volgende groot innovasie dalk ’n piepklein skottelgoedwasser wees vir die enkele bord waarvan ons ons skyfies geëet het.

Lees meer sm