Aangesien Oktober Wêreldmaand vir Troeteldier-vetsug is, val die klem op die herkenning van die waarskuwingstekens van oortollige gewig. Ook in die kollig is ’n begrip van hoe voeding troeteldiere se langtermyngesondheid en lewensgehalte kan beïnvloed. 

Vetsug kom voor wanneer troeteldiere meer kalorieë inneem as wat hulle verbrand, wa lei tot die ophoping van oortollige vet. Verskeie faktore dra daartoe by, onder meer oorvoeding, ’n gebrek aan oefening en selfs genetika.

Troeteldierporsies wys dat onder meer swak voedingsbalans en ekstra tafelafval dikwels die werklike skuldiges agter ’n troeteldier se swak gesondheid is. Pack Leader se bedryfshoof, Sonja Maricevic, sê oortollige gewig is meer as ’n voorkomskwessie, aangesien dit troeteldiere se algemene gesondheid, beweeglikheid en lewensduur kan beïnvloed.

Troeteldierporsies wys dat swak voedingsbalans, onnodige vullers en ekstra tafelafval dikwels die werklike skuldiges agter ’n troeteldier se swak gesondheid is. Foto: iStock

Die volgende wenke kan help met die bestuur van troeteldier-vetsug:

• Porsiebeheer: Maak seker dat jy jou troeteldier se kos volgens die aanbevole porsiegroottes afmeet;
• Gesonde peuselhappies: Oorweeg gesonde peuselhappies of selfs groente soos wortels of groenbone as belonings; en
• Oefening is belangrik: Mik na minstens 30 minute se aktiwiteit elke dag, of dit nou is om flink te stap, ’n speletjie om ’n bal te gaan haal of speeltyd in die agterplaas.

“Ons dink nogal aan ’n mollige troeteldier as ’n oulike troeteldier wat ’n bietjie ekstra gewig dra. Maar ongelukkig is daardie ekstra gewig ’n metaboliese orgaan, en dit beïnvloed dus hul algemene gesondheid en lewensduur.

“Dit is belangrik om die proteïeninhoud van die kos na te gaan. Met gewigsbestuur wil ons hê troeteldiere moet die ekstra vet verloor terwyl hulle spiermassa behou, wat so belangrik is vir beweeglikheid, algemene lewensduur en metaboliese gesondheid.

“Die aanbevole porsiegrootte op die sak moet as ’n vertrekpunt beskou word. Jy moet na die toestand van jou eie troeteldier kyk om te bepaal of dit die regte porsiegrootte is.

“Dit is baie belangrik om bewus te wees van die grootte van die troeteldier wat jy voer en om te onthou dat kos nie liefde is nie. Neem hulle om te gaan stap, gee hulle ’n klein peuselhappie en wys op ander maniere liefde as om net daardie bak oorvol te maak.”

Eienaars behoort hul troeteldier se ribbes te kan voel sonder dat dit deur ’n oormatige vetlaag bedek word. Foto: Morné van Rooyen

Die volgende is tekens van vetsug by troeteldiere:

• Dit is moeilik om ribbes te voel: Jy behoort jou troeteldier se ribbes te kan voel sonder dat oortollige vet dit bedek;
• Die middellyf verdwyn: Kyk vir ’n duidelike middellyf wanneer jy jou troeteldier van bo af bekyk. As dit moeilik is om te sien, kan hulle oorgewig wees; en
• Beperkte beweeglikheid: As jou troeteldier minder aktief lyk of sukkel om op te staan en rond te beweeg, is dit ’n waarskuwingsteken.

OFM Nuus/Zenande Mpame cvs

• Het jy ’n nuuswenk om te deel? Bel of whatsapp die OFM Nuus-lyn 066 487 1427.