‘n Limeriek kan dalk net werk
Om Malema in sy kwaad te sterk
Uit die hospitaal
Is hy gaan haal
En toe maak hy net weer sy merk!
 

Julius hou aan om die snelperk te oorskry
‘n Konvooi met blou ligte wat volspoed ry
Dis sirenes wat loei
Dis ‘n feit soos ‘n koei
Dat niemand vir JuJu voor die hof kan kry



Die Bokke se sukkelende pogings bring wrewel
Die Oumanne het ons teen die Aussies laat sneuwel
Maar Bryce Lawrence se fluit
Wat jou ore laat tuit
Was vir seker die grootste euwel!

Gelukkig had ons nog vir Craig Joubert
Man alleen, in ‘n land so ver
‘n Ref na my hart
Hy verdryf onse smart
Vir hóm moet iemand die Volkslied gaan sêr!

En wie sal vergeet, Ard Matthews se blaps
‘n Geheue vir woorde was by hom maar skraps
Die vers het hom ontgaan
Maar hy vat toe die blaam
En tog wou almal hom dae lank nog raps!

Prof. Niemandt word toe die NG Kerk baas
Die konserwatiewe faksies het min geraas
Gaan Kerkeenheid kom
Na die Belhar-bom?
‘n Mens wonder met Dominees wie’s Baas en wie’s Klaas

Ons Ministers besoek mos die Switserse tronke
Die Openbare Beskermer laat spat toe die vonke
Is geld dalk gesteel?
Verwag maar nie veel
Ter versagting: Die man was waarskynlik beskonke!

Die BlackBerry skok moet mens ook onthou
Oor Drie Dae van Stilte het die drama ontvou
Vir eie gewin
Vryf Apple dit in
Op RIM se prinse kan jy nimmer vertrou!

En Apple se stigter is toe vroeg na sy dood
Maar iPod en iPhone en iPad bly groot
Gaan dit so bly
Gaan Apple begin gly?
Net die tyd sal leer wanneer kom die nood

Moenie van Evan ons fietsryer vergeet
Daai bokspring op YouTube lyk uiters wreed
Gelukkig vir hom
Het hy niks oorgekom
‘n Gebreekte kopskerm is die enigste leed

Max se “maaifoedies” was ‘n klip in die bos
Maar die regering neem aanstoot en wil dit nie los
Die HAT gaan akkoord
Dis ‘n pragtige woord
En ons weet mos ‘n woord-fight is Mad Max se kos!

Die UV se leiers preek rekonsiliasie
Na die Reitz Vier se ding het dit niemand verbaas nie
Die Rektor is ferm
Hy haat ‘n gekerm
Maar party personeel is op ‘n ánder stasie...

En dan, ten slotte, die Tutu-tirade
Verwoed kap hy na die Zuma-brigade
Die Dalai Lama’t gelag
Hy dit seker verwag
Maar elders in die wêreld ly ons beeld groot skade..

En daarmee groet ek tot ‘n volgende keer
Wie weet, dalk doen ons dit eendag nog weer
Miskien is die rym
Die veiligste lym
Om allerlei stories mee beter te verteer

 

(Foto’s: GOOGLE IMAGES)