Die fossiel van die dier, Spicomellus afer, wat sowat 165 miljoen jaar gelede gedurende die Jura-tydperk geleef  het, toon die spesie het meter lange stekels gehad wat uit sy nek gesteek het. Wetenskaplikes het die vonds vandeesweek aangekondig.

Volgens navorsers was die kolos uit die oertyd 4?m lank en het dit tot 1,8 ton geweeg. Dit was bedek met van die mees uitgebreide pantser wat nog by enige dinosourus aangeteken is. 

’n KI-voorstelling van hoe die ‘Spicomellus afer’ met sy stekels sou gelyk het.

Die stekels, waarvan een 87 cm lank was, steek soos gholfstokke uit ’n omhulsel van been om die nek. Twee groot stekels steek ook bo die heupe uit, en die rug is ook vol beenplate en stekel.

“Die pantser van die Spicomellus is asemrowend vreemd – anders as enige ander dinosourus of lewende of uitgestorwe dier wat ons al ontdek het,” sê prof. Richard Butler, mede-leier van die navorsingspan en ’n paleontoloog wat op gewerweldes fokus. 

Die Spicomellus is die vroegste bekende lid van die “gepantserde” Ankilosourus-genus.

Stekels ‘dalk om maat te lok’

Hoewel die pantser waarskynlik ’n verdedigingsfunksie gehad het, meen Butler dat die nekstekels waarskynlik nie net vir beskerming was nie. “Dit lyk soos oordrewe wapens – amper onprakties vir verdediging,” het hy gesê.

Volgens sy medenavorser Susannah Maidment kan sulke strukture, soos takbokhorings of poustertvere, dikwels met paringsgedrag of territoriale vertoon verband hou.

“Ons vermoed dat Spicomellus se pantser dalk eerder vir vertoon as vir verdediging ontwikkel het – moontlik om ’n maat te lok of mededingers af te skrik.”

Bronne: sciencealert.com, abc.net, devdiscourse.com

OFM Nuus cvs