Ilya van den Berg (5) van Kroonstad is gelukkig om terug by haar skooltjie te wees nadat sy uitgevind het haar kanker is in remissie – alle tekens en simptome van die kanker het verdwyn – en haar beenmurg is skoon. 

Die kinders by die skool was baie opgewonde om Ilya weer te sien, sê Seugnet Oelofse, eienaar van The Growing Tree in Kroonstad.

’n Uitgeputte Ilya sê dis heerlik om terug by die skool te wees saam met al haar maatjies. Sy geniet dit om saam met haar maatjies te wees en sien uit daarna om kunsvlyt te doen en briefies te skryf.

Ilya vertel dat haar maatjies by die skool vir haar gebid en briefies gestuur het.

Sy het tydens haar siekte geleer dat sy dapper is. Leukemie is in 2023 by haar gediagnoseer nadat sy na ’n dokter is weens die kindersiekte pampoentjies.

OFM Nuus het vroeër berig Zuna-Marie, Ilya se ma, het gesê Ilya se kankersimptome het skielik voorgekom. Haar simptome het moegheid, koors en bleekheid ingesluit.

OFM Nuus/Heidrè Malgas cg