Central SA
DA vra hofbevel om grondbesetters te vervolg─── ZENANDE MPAME 11:20 Thu, 07 Mar 2024
“Versuim of weiering om onmiddellik op te tree ingevolge die tussentydse hofbevel wat die metro Saterdag verkry het, moet onwettig verklaar word.”
Metroraadslede het Woensdag (6/3) bymekaargekom vir ’n spesiale raadsvergadering om die onwettige grondbesetting in die stad te bespreek.
Die DA het ’n aansoek by die hof ingedien vir ’n dringende hofbevel Vrydag (8/3) om die grondbesetters te vervolg en dat die versuim of weiering om onmiddellik op te tree ingevolge die tussentydse hofbevel wat die metro reeds Saterdag verkry het, onwettig verklaar word.
“Die DA het ’n aansoek by die Vrystaatse Hooggeregshof ingedien waarin geregtelike ingryping gevra word om die interdik af te dwing om grondbesetting in Lourierpark te voorkom. Ons regsverteenwoordigers is opdrag gegee om die metro te dwing om Saterdag se hofbevel uit te voer,” het Roy Jankielsohn, Vrystaatse DA-leier, gesê.
Die DA se aansoek by die Vrystaatse Hooggeregshof. Foto verskaf
“Dit is duidelik dat inwoners van die omliggende gemeenskappe, wat Lourierpark en Pellissier insluit, ontsteld is oor die verwikkelinge op hul drumpel, wat hul verblyfsekerheid en sosiale samehorigheid bedreig.”
Gregory Nthatisi, burgemeester van die Mangaung Metro, het gesê dis nie die DA wat die probleem opgelos het nie, maar die munisipale bestuurder, Sello More, wat die hofbevel bekom het en volgens hom, voer hulle die opdrag uit.
“Die strukture wat reeds opgerig is, kan eers verwyder word wanneer ’n finale uitspraak verkry word, wat ongeveer 30 dae sal duur,” het Nthatisi gesê.
Die burgemeester van die Mangaung Metro, Gregory Nthatisi, het gesê dis nie die DA wat die probleem opgelos het nie. Foto: Facebook/Mangaung Metro-skermgreep
“Volgens die tussentydse bevel word boumateriaal en gedeeltelik geboude strukture verwyder.”
Die AfriForum Buurtwag het inwoners intussen in kennis gestel dat hulle die status van onwettige besetters op die Jagersfontein-pad fyn dophou. Die polisie het voertuigkontrolepunte begin, en die verkeersafdeling en buurtwagpatrolleerders is op verskeie plekke en moniteringsterreine gestasioneer.
“Ons monitor die situasie sedert vroegoggend en is op hoë gereedheid om in te tree as beskerming van eiendom nodig word, asook om hoë sigbaarheid in Pellissier en omliggende gebiede te versterk,” sê Christo Groenewald, koördineerder van Bloemfontein Afriforum.
Mangaung Mayor accused of shielding land invaders VIDEO-PHOTO GALLERY
Dertien mense is Saterdag (3/3) in hegtenis geneem vir die oortreding van ’n hofbevel en grondbetreding. Hulle het Dinsdag (5/2) in die Bloemfonteinse landdroshof verskyn. Hulle bly in aanhouding en moet Vrydag weer voorkom.
