Vermeende transitorowers in Bloemfontein het op lede van die Suid-Afrikaanse Polisiediens (SAPD) geskiet nadat ’n onbekende bedrag kontant Saterdagmiddag (25/5) uit ’n geldwa naby Lemo Mall, Heidedal, geroof is. Niemand is egter beseer nie.

“Verdagtes wat in twee wit Toyota-bakkies en ’n BMW gery het, wat later aan die brand gesteek is, het glo in die geldwa vasgery voordat hulle van die toneel in die rigting van die Heidedal-begraafplaas en die nabygeleë M10 gevlug het,” sê die Valke se woordvoerder, Zweli Mohobeleli.

Hy sê twee vuurwapens wat aan sekuriteitspersoneel behoort het, is geneem. Hy sê oook dat daar op SAPD-lede, wat in die omgewing was, geskiet is maar dat hulle nie gewond is nie.

Mohobeleli doen ’n beroep op die publiek – indien iemand enige inligting oor die rooftog het, bel speurkaptein Lunga Sitele by 082 697 6023 of besoek die naaste polisiestasie. Stop Misdaad (0800 10111) kan geskakel word of ’n anonieme wenk kan op die MySAPS-app gelos word.

Die polisie vra die publiek om nie die verdagtes te konfronteer nie aangesien hulle wapens het en as gevaarlik beskou word.

OFM Nuus cg