Die burgerregte-organisasie AfriForum voer aan dat die Dawid Kruiper-munisipaliteit nie behoorlike prosedures vir openbare deelname gevolg het met hul voorstel om Schröderstraat na Q.A. Gubulastraat te verander nie, sê Werner Strauss, AfriForum se distrikkoördineerder vir die Noord-Kaap.

“Die groep doen ’n oproep vir die onmiddellike opskorting van die naamsverandering en dring daarop aan dat ’n deursigtige en inklusiewe konsultasie met die gemeenskap moet plaasvind voordat enige besluit gefinaliseer word.”

Volgens AfriForum is dit nie net ondemokraties om voort te gaan sonder gemeenskapsinsette nie, maar ondermyn dit ook die kulturele en historiese struktuur van die dorp.

Moenie ten koste van geskiedenis gebeur

Volgens Strauss was Q.A. (Alfred) Gubula ’n prominente anti-apartheidsaktivis en leier van die United Democratic Front (UDF) in die Noord-Kaap, bekend vir sy rol in opstande in Upington gedurende die jare 80. Terwyl sommige inwoners die voorgestelde naam beskou as ’n manier om sy nalatenskap te vereer, meen AfriForum dit moenie ten koste van die omgewing se geskiedenis gebeur nie.

Hy sê Schröderstraat is genoem na eerw. Christiaan Schröder, ’n sendeling wat in 1875 ’n kerk en sendingstasie gestig het in die gebied wat toe as Olyfenhoudtsdrif bekend was. Sy bydraes was belangrik vir die stigting van die dorp, en die oorspronklike sendinggebou dien nou as die Kalahari-Oranjemuseum.

“Schröderstraat is deel van die dorp se geskiedenis, en baie inwoners voel baie sterk dat hierdie naam nie bloot verander moet word nie,” sê hy. “Ons is gekant teen eensydige en politiek-gedrewe besluite wat die stemme van die mense ignoreer.”

Kommer oor koste van hernoeming van strate

AfriForum het ook sy kommer uitgespreek oor die koste van die hernoeming van strate, en voorgestel dat nuwe name in nuwe ontwikkelings of vir strate met minder geskiedkundige betekenis gebruik kan word.

Strauss sê die organisasie win tans regsadvies in en kan verdere stappe doen as die proses nie reggestel word nie. “Dit het die gemeenskap aangespoor om die herbenaming teen te staan en hulle uit te spreek teen wat beskou word as ’n poging om politieke ideologie sonder konsensus af te dwing.

“Die behoud van kultuur en geskiedenis is noodsaaklik vir sosiale samehorigheid,” sê hy. “Ons sal nie toekyk terwyl ons historiese erfenis ‘oorgeskryf word’ sonder behoorlike bespreking en deelname nie.”

OFM Nuus/Charne van der Merwe cg