Central SA
Oorlogsmuseum as topmuseum in Suid-Afrika vereer─── ZENANDE MPAME 11:56 Fri, 29 Aug 2025
Die Oorlogsmuseum van die Boererepublieke in Bloemfontein is deur die nasionale departement van sport, kuns en kultuur as een van die beste drie museums in die land aangewys.
Die museum is bekend vir sy publikasies, konferensies en uitstallings wat insig bied in die agtergrond waarteen die Anglo-Boereoorlog (1899–1902) in die Vrystaat en Transvaal ontvou het.
Dit geskied deur sy unieke kunsversameling, dioramas en uitstallings, wat die lyding van oorlog en geweld teen vroue en kinders uit alle gemeenskappe in Suid-Afrika uitbeeld.
Die museum is benoem en het Saterdag 23 Augustus op die Nasionale Kuns-en-kultuurtoekennings vir 2025 in Sun City dié erkenning ontvang. Die ander uitblinkers is die William Humphreys-kunsgalery in Kimberley en die KwaZulu-Natalse Museum in Pietermaritzburg.
“Die museum is geëerd om saam met ons mede-entiteite van die departement van sport, kuns en kultuur benoem te wees en dat ons harde werk erken word,” sê Dané Swanepoel, bemarkingsbestuurder.
“Ons bestuur en span by die museum werk baie hard om ons museum mooi en professioneel te hou en om te verseker dat ons goeie diens aan die publiek lewer.”
Die publiek word uitgenooi om Saterdag 20 September “die erfenis, kultuur, avontuur en die beste van die Vrystaat” te kom vier tydens Free State Uncovered by die Oorlogsmuseum, sê Swanepoel.
Die museum bevorder nie oorlog nie, maar wys die geskiedenis soos dit was. Foto: Verskaf
In Julie het die museum vir die derde agtereenvolgende jaar ’n ongekwalifiseerde ouditmening sonder bevindings van die ouditeur-generaal ontvang. Die musempersoneel is trots daarop dat daar vir die afgelope 15 jaar geen onreëlmatige, vrugtelose of verkwistende besteding was nie.
“Hierdie prestasie verg baie harde werk, en al ons personeel deel ’n gemeenskaplike passie – hul werk beteken vir hulle alles,” sê Tokkie Pretorius, museumdirekteur.
“Die museum bevorder nie oorlog nie, maar wys die geskiedenis soos dit was, en bevorder dus genesing en sosiale samehorigheid, want ons glo dat genesing kan kom deur wonde oop te maak – sodat Suid-Afrika vorentoe geneem kan word.”
Die museum het in Julie vir die derde agtereenvolgende jaar ’n ongekwalifiseerde ouditmening sonder bevindings van die ouditeur-generaal ontvang. Foto verskaf
Dr. Vicky Heunis, versamelingsbestuurder, het bevestig dat die museum in November ’n publikasie oor buitelandse betrokkenheid by die Anglo-Boereoorlog gaan uitreik.
OFM Nuus het vroeër berig die Free State Uncovered Tourism Festival & Expo is geskep in reaksie op die gebrek aan verteenwoordiging vir plaaslike ondernemings by groot geleenthede soos die World Travel Market in Kaapstad en die Toerisme-indaba in Durban.
Hierdie fees, wat Saterdag 20 September van 09:00 by die Oorlogsmuseum gehou word, bied ’n platform vir versteekte juwele regoor die provinsie om hul aanbiedinge aan inwoners te vertoon.
