Duikeenhede soek Donderdag (23/10) verder na die liggaam van ’n 20-jarige wat glo ’n week gelede in die steengroef agter die Twin City Mall verdrink het. Volgens die polisie is die water in die groewe misleidend diep en uiters gevaarlik.

Benjamin van Wyk (20) en twee vriende het Donderdag (16/10) die steengroef besoek om te swem. Hy het glo in die water gespring, gou oorweldig geraak en verdrink. Sy liggaam het onder die water verdwyn en is nog nie gevind nie.

Dit is nie die eerste lewe wat dié groef eis nie. Inwoners het al vroeër versoek dat die steengroef veiliger gemaak word, veral ná die eerste verdrinkings in 2016. “Alle beskikbare hulpbronne is ontplooi om bystand te verleen in die operasie, wat nou al in sy sewende dag is,” sê Vrystaat-polisiewoordvoerder Mahlomola Kareli.

“Die Bloemfontein-duikeenheid, saam met kollegas van die Welkom-duikeenheid, werk onverpoos om die moontlik verdrinkte 20-jarige op te spoor.

“Die polisie doen ’n dringende beroep op die gemeenskap om te weerhou daarvan om in die groewe te swem. Die water is bekend daarvoor dat dit gevaarlik diep is en ’n ernstige lewensgevaar inhou.”

Die DA eis dringende ingryping om nog verdrinkings te voorkom, aangesien inwoners in die groewe swem omdat die openbare swembad gesluit is. Die party sê dit sal by die volgende raadsvergadering ’n formele versoek indien om die munisipaliteit te verplig om ’n dringende skoonmaak- en instandhoudingsprojek vir die Heidedal-swembad te begin.

Inwoners het ook kommer uitgespreek oor die ontoeganklike toegangsfooie van R21 per kind en R34 per volwassene. 

Die DA sê hy sal voorts ’n formele voorstel indien om Mangaung te verplig om die swembad dringend skoon te maak, in stand te hou, en om die fooie te herevalueer en ’n subsidieskema te implementeer vir bekostigbare toegang.

Swembad bly gesluit

“Die Heidedal-swembad bly gesluit ten spyte van planne om dit op 1 September te open,” sê DA-rdl. Attie Terblanche. “Die swembad is in ’n verskriklike toestand: die water is groen en vuil, die erf is toegegroei, en daar is geen swembadchemikalieë of voldoende redders beskikbaar nie.

“Die sluiting van die swembad ontneem inwoners nie net van ’n veilige ontspanningsplek nie, maar stel ook lewens in gevaar.”

• Het jy ’n nuuswenk om te deel? Skakel of whatsapp die OFM Nuus-lyn: 066 487 1427.

OFM Nuus/Zenande Mpame mvh