Die Rail Trail in die Parys Wetland Park word tans met nog 600 m in die rigting van die ou stasiegebied verleng. Die eerste 1,4 km van die roete word reeds deur die gemeenskap gebruik om tussen woongebiede, die dorp en nywerheidsgebiede te beweeg.

Die uitbreiding maak deel uit van die voortdurende ontwikkeling van die park en moet die roete toegankliker maak vir die honderde voetgangers wat daagliks deur die gebied beweeg, sê Leida Schuman, koördineerder van Parys Wetland Park.

“Die Rail Trail help honderde voetgangers om daagliks droogvoets deur die vleiland tussen woongebiede, die dorp en die nywerheidsgebied te beweeg,” sê Schuman. Die ou spoorlyn is gelyk gemaak en opgevul om ’n toegankliker roete te skep.

Voetgangers, stappers, drawwers en fietsryers kan die roete gebruik. Wanneer die huidige uitbreiding voltooi is, sal inwoners by die brug in Father Balinkstraat of verder af by Dolfstraat toegang tot die Rail Trail kan kry.

Die roete bied ’n veiliger alternatief vir inwoners wat tans ander, minder geskikte paaie moet gebruik om hul bestemmings te bereik. Die groter visie is om dit ook deel van ’n aktiewe openbare ruimte te maak wat op verskillende maniere benut kan word.

Die Rail Trail kan ruimte bied vir oggend- en aandstappies, hardloop, fietsry en ander buitelugaktiwiteite. Dit skep ook moontlikhede vir gemeenskapsaktiwiteite en kleiner geleenthede namate meer inwoners die gebied begin gebruik.

Die Rail Trail bied ook ’n geleentheid om mense nader aan die natuur te bring.  Foto verskaf

Die toenemende gebruik kan nuwe geleenthede vir plaaslike entrepreneurs skep. Inwoners kan moontlik koffie en kos verkoop, handwerk aanbied of begeleide stap- en voëlkykaktiwiteite en ander kleinskaalse ondernemings in die gebied bedryf.

Die ontwikkeling van die Rail Trail is terselfdertyd deel van ’n groter poging om die vleiland oop en veiliger te maak. Gebiede langs die roete was voorheen op plekke dig oorgroei en ontoeganklik.

Groot hoeveelhede indringerplante en droë plantegroei is die afgelope tyd verwyder, wat die sigbaarheid en toeganklikheid verbeter, sê Schuman. 

Die Parys Working on Fire-span het ook met ’n beheerde brand gehelp om katbos, ander indringerplante en droë takke te verwyder.

Die samewerking met Working on Fire maak deel uit van ’n breër gemeenskapsbenadering wat ook bewusmaking oor brandvoorkoming insluit. Die Parys Wetland Park-span wil eindelik hê die vleiland moet deel van inwoners se alledaagse lewe word.

“Honderde mense beweeg reeds daagliks deur die gebied op pad werk toe, skool toe of na die dorp. Deur ’n meer georganiseerde en toeganklike roete te skep, word die vleiland nie net bewaar nie, maar ook prakties tot voordeel van die gemeenskap aangewend.”

Die Rail Trail bied ook ’n geleentheid om mense nader aan die natuur te bring. “Ons wil die vleiland deel maak van hoe mense Parys ervaar – ’n plek wat gemeenskappe, die natuur en die dorp met mekaar verbind,” sê Schuman.

OFM Nuus/Charne van der Merwe sm

• Het jy ’n nuuswenk om te deel? Bel of whatsapp die OFM Nuus-lyn by 066 487 1427.