Die vier verdagtes (tussen 38 en 51) moes Vrydag (6/11) in die Rustenburgse landdroshof verskyn. Hulle word aangekla van die onwettige besit van bedreigde spesies ingevolge die Wet op Nasionale Omgewingsbestuur: Biodiversiteit.

Die verdagtes is Woensdagmiddag tydens ’n intelligensiegedrewe operasie by Waterfall Mall in Rustenburg aangekeer. Die polisie het vooraf inligting ontvang dat ’n groep mense glo twee wyfie-ietermago’s aan voornemende kopers wou verkoop, teen sowat R500 000 vir elke dier.

Sers. Kelebogile Morake, Noordwes-polisiewoordvoerder, sê die inligting is aanvanklik deur misdaadintelligensiebeamptes van Ivory Park ontvang. ’n Gesamentlike operasionele span is daarna saamgestel om die verdagtes op te spoor en die bedreigde diere te red voordat die beplande transaksie kon plaasvind.

Die wit BMW wat in die misdaad gebruik is. Foto: SAPD

Die span het bestaan uit misdaadintelligensiebeamptes van Noordwes en Ivory Park, die Ivory Park-taakspan, Phokeng se honde-eenheid, die Rustenburgse taktiese reaksiespan en lede van die private veiligheidsmaatskappy Safeguard Risk Services. Hulle het die parkeerterrein van die winkelsentrum dopgehou en vir die verdagtes gewag.

’n Wit BMW waarin die vier gereis het, is opgemerk toe dit die parkeerterrein binnery. Die operasionele span het die voertuig voorgekeer en toestemming gekry om dit te deursoek. Twee lewende ietermago’s is in die motor se bagasieruim aangetref.

Morake sê die vier insittendes kon nie ’n aanvaarbare verduideliking gee waarom hulle die bedreigde diere in hul besit gehad het nie. Hulle is op die toneel in hegtenis geneem. Die ondersoekbeamptes het ook vasgestel dat die BMW vals nommerplate gehad het.

Veilige bewaring

Beslag is gelê op die voertuig en dit sal deel uitmaak van die verdere ondersoek. Beamptes van die Rustenburgse plaaslike misdaadrekordsentrum en die departement van bosbou, visserye en die omgewing is na die toneel ontbied om met die ondersoek en hantering van die diere te help.

Die twee ietermago’s is deur amptenare van die departement in veilige bewaring geneem. Die polisie het nog nie besonderhede bekendgemaak oor hul gesondheidstoestand, waar hulle vandaan kom of wat uiteindelik met hulle gaan gebeur nie.

Ondersoekers probeer nou vasstel of die vier verdagtes deel van ’n groter netwerk is wat bedreigde spesies onwettig vang, vervoer en verkoop. Die aanvanklike intelligensie dui daarop dat die diere reeds vir verkoop bestem was, maar die identiteit van moontlike kopers is nie bekend gemaak nie.

Lt.genl. Arthur Adams, Noordwes-polisiekommissaris, loof die betrokkenes vir hul vinnige optrede en samewerking oor provinsiale grense heen. Hy beklemtoon die polisie is steeds daartoe verbind om bedreigde dierspesies te beskerm en mense wat by wildmisdaad betrokke is, voor die gereg te bring.

OFM Nuus dg

• Het jy ’n nuuswenk om te deel? Bel of whatsapp die OFM Nuus-lyn by 066 487 1427.