Die Namakwalandse blomseisoen is ’n jaarlikse verskynsel waartydens die halfwoestyngebied van die Noord-Kaap in ’n uitgestrekte tapyt van madeliefies, vygies en inheemse bolplante omskep word. SanParke-woordvoerder JP Louw sê gunstige weersomstandighede het reeds kleurvolle lenteblomme in verskeie dele van die park opgelewer, hoewel die blomvertoning nog in ’n vroeë stadium is.

“Besoekers wat die (Namakwa Nasionale) Park verken, kan tans verskeie blomspesies geniet, waaronder die Namakwalandse bittergousblom, bergmagriet, soetgousblom, Namakwalandse madeliefie, sambreeltjies, bokbaaivygies, glansogies, blou en wit sporries, wit-soe, verskeie Oxalidaceae-spesies of surings, duikerwortel en verskeie kleurvolle vygiespesies.” 

Die seisoen vir veldblomme in Namakwaland begin aanbreek. Foto verskaf

Hoewel die blomme in sommige gebiede nog yl voorkom, beskou SanParke dit as ’n positiewe aanduiding dat die seisoen geleidelik momentum kry.

“Indien diehuidige weerpatrone voortduur, kan besoekers verwag dat die landskap oor die komende weke al hoe kleurvoller sal word,” voeg Louw by.

Die jaarlikse blomseisoen sal na verwagting tussen middel Augustus en middel September sy hoogtepunt bereik, mits die weersomstandighede gunstig bly.

SanParke beveel aan dat besoekers op sonnige dae gaan wanneer die temperatuur 18 °C of hoër bereik, aangesien die meeste blomme in warm sonskyn ten volle oopgaan.

Hektye:

• Skilpad-ruskamp: 07:30–16:00
• Groenrivier-ruskamp: 08:00–17:00

Bewaringsfooie, geldig tot 31 Oktober 2026:

• Suid-Afrikaanse volwassene met SA-identiteitsdokument: R62
• Suid-Afrikaanse kind van 2 tot 11 jaar: R32
• SAOG-volwassene: R130
• SAOG-kind van 2 tot 11 jaar: R62
• Internasionale volwassene: R130
• Internasionale kind van 2 tot 11 jaar: R62

Die Namakwa Nasionale Park nooi natuurliefhebbers, fotograwe en buitelugentoesiaste om die besonderse seisoenale gedaanteverwisseling te ervaar. Namate miljoene veldblomme geleidelik oor die landskap verskyn, bied elke besoek ’n ander skouspel, met die blomme wat van week tot week verander en nuwe kleurtonele deur die seisoen skep.

OFM Nuus sm

 Het jy 'n nuuswenk om te deel? Skakel of WhatsApp die OFM-nuuslyn by 066 487 1427.