Lynette Beer, spreker, skrywer en temperamentkenner, sluit aan by Yolanda Maartens in die Familie Fokus-week op OFM: Grootmaak vir die Lewe. Dit is swaar om jou kind te sien huil omdat hy nie vir die span gekies is nie, met ’n maatjie baklei of ’n swakker punt gekry het.

Ons eerste reaksie is dikwels om die probleem dadelik weg te neem. Tog ontdek ’n kind nie net deur ons aanmoediging dat hy iets kan hanteer nie. Hy ontdek dit wanneer hy ’n moeilike oomblik beleef, hulp vra en weer probeer.

Dit beteken nooit dat ons doelbewus pyn moet skep of ’n kind aan homself moet oorlaat nie. Klein, hanteerbare teleurstellings bied ruimte om gevoelens te benoem, ’n volgende stap te vind en weer op te staan. Ons bly naby genoeg om te luister en te help dink.

Moenie oorneem nie

Gee verantwoordelikheid wat by jou kind se ouderdom en vermoë pas. ’n Jonger kind kan speelgoed wegpak. ’n Ouer kind kan met jou hulp beplan hoe om met ’n onderwyser te praat. ’n Tiener kan ’n eenvoudige begroting bestuur of self ’n moeilike oproep maak.

Wanneer jou kind by ’n probleem kom probeer eers vra: “Wat dink jy kan jou eerste stap wees?” of “Watter twee moontlikhede sien jy?” Daarmee wys jy vertroue in sy vermoë om te leer, terwyl jy steeds beskikbaar bly vir leiding.

Wanneer om in te gryp

Vra jouself drie dinge voordat jy besluit. Is my kind in gevaar, of is daar afknouery, bedreiging, uitbuiting of ’n ernstige magswanbalans? Dan moet ’n volwassene ingryp. Is die uitdaging redelik vir my kind se ouderdom en huidige vermoë? Dan kan jy jou kind eerder help om self ’n oplossing te vind as om die probleem namens hom op te los. 

Het my kind nou ondersteuning nodig, of wil ek my eie ongemak oor sy trane laat verdwyn? Terugstaan is nie onverskilligheid nie. Dit beteken jy bly emosioneel beskikbaar terwyl jy jou kind kans gee om ’n volgende tree te probeer. So leer kinders om hulp te vra, foute reg te stel, konflik met respek te hanteer en ná ’n terugslag weer te begin.

• Probeer vandag: Vra ‘Wat dink jy is jou eerste stap?’ voordat jy ’n probleem namens jou kind oplos.

https://www.lynettebeer.co.za/

OFM dg