Terwyl Gadi Eisenkot se sentristiese Yashar-party sy voorsprong bo premier Benjamin Netanyahu se Likud vergroot het, wen verregse partye terselfdertyd toenemende steun onder jong kiesers. Volgens ’n onlangse peiling staan Yashar op 23 setels in die 120-setel-Knesset, vier meer as Likud se19. 

Die sentrum-regse B’Yachad van Naftali Bennett se steun het tot 14 setels gestyg, terwyl Yair Golan se Demokrate op nege staan, berig The Jerusalem Post. Desnieteenstaande lyk dit of geen politieke blok die vereiste 61 setels sal behaal om alleen te kan regeer nie.

Netanyahu se regse en godsdienstige koalisie se steun staan tans op ’n geraamde 48 setels, terwyl opposisiepartye gesamentlik 54 setels kan wen. Dit beteken kleiner partye en moontlike koalisievennote sal waarskynlik ná die verkiesing die mag hê om die volgende regering saam te stel. 

Benjamin Netanyahu. Foto: Israeliese regering

Teen dié agtergrond vestig ontleders die aandag op meer as ’n halfmiljoen jong mense wat vanjaar vir die eerste keer stem. Meningspeilings toon meer as 16% van dié groep beoog om vir die verregse partye van Itamar Ben-Gvir of Bezalel Smotrich te stem, berig BBC News. Byna driekwart van jong kiesers beskryf hulself as regs of sentrum-regs.

Talle jong Israeli’s se politieke sienings word gevorm deur die Hamas-aanval van 7 Oktober 2023 en die daaropvolgende konflik. Ondersteuners van Ben-Gvir sê sy sterk veiligheidsboodskap gee hulle vertroue in ’n onsekere tyd. Kritici meen egter sy nasionalistiese retoriek en standpunte oor Palestynse gebiede verdiep spanning en verdeeldheid binne Israel.

Politieke waarnemers wys daarop dat jong Joodse Israeli’s reeds vir jare verder na regs beweeg as ouer geslagte. Baie van hulle het grootgeword tydens opeenvolgende konflikperiodes en het min herinnering aan vredesonderhandelinge tussen Israeli’s en Palestyne.

Sosiale media speel ook ’n toenemend belangrike rol. Platforms soos TikTok en Instagram het belangrike politieke slagvelde geword waar partye jong kiesers probeer bereik. Volgens waarnemers het Ben-Gvir vroeg besef hoe kragtig dié platforms is, maar ander partye, waaronder Bennett se B’Yachad, volg nou dieselfde strategie.

Die politieke spektrum bly wyd. Aan die linkerkant staan die Arabiese Gesamentlike Lys en Ra’am, gevolg deur die sentrum-linkse Demokrate. In die middel staan Yashar, terwyl B’Yachad en Yisrael Beytenu die sentrum-regse ruimte beset. Likud, Shas en Verenigde Torah Judaïsme vorm die kern van die tradisionele regtervleuel, met Religieuse Sionisme-Zehut en Otzma Yehudit aan die verregse kant.

Die jongste peilings dui dus daarop dat die stryd om Israel se toekoms nie net tussen links en regs gevoer word nie, maar ook tussen generasies. Indien jong kiesers in groot getalle opdaag, kan hulle die deurslag gee in een van die mees onvoorspelbare verkiesings in Israel se moderne geskiedenis wat in ’n kop-aan-kop-wedloop kan ontaard.

OFM Nuus sm

• Het jy ’n nuuswenk om te deel? Bel of whatsapp die OFM Nuus-lyn by 066 487 1427.