Polisiewoordvoerder, Mamello Mokhuoane, sê ‘n 21-jarige man wat verlede Donderdag in hegtenis geneem is op Virginia by ‘n sentrum van Korrektiewe Dienste wat mense op parool hanteer, staan tereg op die moord van die 24-jarige Kay-Leen Peterson. Haar lyk is Donderdag deur ‘n familievriend in haar woonstel op die dorp gevind nadat kollegas van die Lake View Laerskool haar nie op haar selfoon in die hande kon kry nie. Sy het Woensdag nie by die skool opgedaag nie. 

Mokhuoane sê die verdagte staan ook tereg op aanklagte van huisroof en motordiefstal in verband met die Peterson-moord.  

Volgens Mokhuoane is nog ‘n man, wat verlede week vir ondervraging ingeneem is, intussen vrygelaat omdat hy nie met die moord op Peterson verbind kon word nie. Sy sê Peterson het verskeie steekwonde opgedoen.  

Haar motor is verlede week verlate op Seloja, Meloding, gevind.

Die verdagte verskyn na verwagting vanmiddag in die Virginia-landdroshof.

OFM-nuus