National
Video: SAUK-joernaliste tydens regstreekse uitsending beroof─── 06:51 Wed, 11 Mar 2015
Johannesburg - TV-joernaliste van die SAUK is gisteraand tydens 'n regstreekse uitsending in Johannesburg beroof.
'n Bydraende redakteur, Vuyo Mvoko, buitelandse redakteur, Sophie Mokoena en verslaggewer Chriselda Lewis was besig om voor te berei vir 'n regstreekse uitsending vir die nuusbulletin op SABC3 vanaf die Milpark-hospitaal in Johannesburg waar president Edgar Lungu van Zambië mediese toetse sou ondergaan.
In die beeldmateriaal wat uitgesaai is en wat toe deur die SAUK op YouTube gelaai is, kan gesien word hoe drie mans kort voordat die uitsending begin agter Mvoko verbystap en dan terugdraai. Een van die mans gryp na Mvoko, oënskynlik om die selfoon in sy hand te vat. Een van die verdagtes was glo gewapen.
Die rowers het gevlug.
