Die besturende direkteur van dié forum, Pieter Vervoort, sê dit is belangrik om in die beginfase die situasie deeglik te ontleed. Vervoort was onder die betrokkenes in die rooivleisbedryf wat Maandag met die regering in Pretoria vergader het. Dié vergadering is deur die Minister van Landbou, Senzeni Zokwana, bygewoon. Vervoort sê die inenting van beeste in 'n 20km radius om die gebied wat geraak word, het alreeds begin.  Volgens hom is Suid-Afrika se handelsvennote se reaksie op die Wêreld Organisasie vir Dieregesondheid, (OIE) se tydelike verbod op die uitvoer van Suid-Afrikaanse produkte van diere met gesplete hoewe, insluitend varke, bokke en skape, verstaanbaar. Hy sê die OIE se besluit om Suid-Afrika se bek-en-klouseervrye status tydelik op te skort het 'n impak op markte, waar daar nou 'n tydelike oorskot plaaslik is wat pryse ietwat laat daal het. 

EN

Daarmee saam is die wolbedryf ietwat onder druk in terme van woluitvoer, maar daar word steeds na sekere lande uitgevoer. Die Nasionale Wolkwekersvereniging, NWKV, se uitvoerende hoof, Leon de Beer, sê Suid-Afrika voer steeds wol uit na China ondanks die feit dat sy bek-en-klouseervrye status tydelik opgeskort is.

OFM-nuus