Die minister van landbou, grondhervorming en landelike ontwikkeling, Thoko Didiza, het die aankondiging op 'n mediakonferensie gedoen. Didiza het gesê trekkervervaardiging sal hervat word en winkels, wat landbou-produkte verkoop, kan voortgaan daarmee. 

Veeveilings sal ook onder streng veilingheidsmaatreëls plaasvind, terwyl uitvoer mag geskied. Dit sluit wyn en sekere ander alkoholprodukte in. Didiza het ook vroeër in 'n mediaverklaring aangekondig altesaam 42 444 aansoeke is vir die departement se R1,2 miljard se Covid-19-ingryping, hoofsaaklik vir kleinboere, ontvang. Volgens haar is 'n 100%-koers van vorms, wat ingedien is, behaal. Daar is reeds begin met die evalueringsproses, en daar word gepoog om teen 8 Mei al die prosesse te voltooi, waarna boere wat goedgekeur is vir dié hulp koopbewyse sal ontvang om benodigdhede vir hul boerderye te bekom.

EN

Soos oudergewoonte, verskaf 'n bekende in die veebedryf, Chris Derksen, vandag weer die veilingspryse wat op lewende hawe veilings behaal is. Hy versprei dié inligting sodat produsente en kopers dieselfde inligting tot hul beskikking het om sodoende ingeligte besluite te neem met die aankoop en verkoop van lewende hawe op veilings. Die Noord-Vrystaat word as 'n indeksgebied gebruik. Derksen kan slegs aanduidende pryse verskaf, omdat daar vandeesweek steeds onduidelikheid was oor die aanbied van veeveilings. Derksen sê die prys van lewende hawe is onderdruk en speenkalwers se prys is sowat R26,50 per kg.

OFM-nuus