Sien onderstaande PODCAST

Veediefstalgetalle was relatief stabiel vir die 2021/22-boekjaar, met 'n afname van 5,75% in diefstalsake. Die voorsitter van die Nasionale Veediefstalvoorkomingsforum, Willie Clack, sê ten spyte hiervan het die waarde van vee wat gesteel is met 11% toegeneem, wat boere meer as een miljard rand vir die jaar gekos het. Clack sê daar is nie veel wat die regering kan doen om veediefstal te bekamp nie, aangesien hulle reeds baie gedoen het.

Landbouers kan 'n boete ontvang indien hulle nie daarin slaag om hul loonopgawes vóór 31 Januarie 2023 in te handig nie. Work Accident Support se Stephan Pietersen sê die vergoedingsfondskommissaris het op 15 November ‘n kennisgewing onderteken waarin besighede, insluitend produsente, gemaan word om hulle 2021-loonopgawes vóór die versoekte datum in te handig. Pietersen sê indien die vooruitskatting nie korrek is nie, kan produsente aansoek doen dat die Vergoedingsfonds sy rekening hersien.

Die oppervlakte wat met kersies beplant is, het die afgelope vyf jaar met 77% toegeneem, met 24 produsente wat op 33 plaaseenhede boer. Volgens 'n ekonoom by Hortgro, Nina Viljoen, kan die oppervlakte wat in die volgende vyf tot ses jaar beplant word, met 90% tot byna 1 040 hektaar uitbrei. Sy sê kersieproduksiegebiede sluit die Wes-Kaap, Vrystaat, Noordwes, Gauteng, Mpumalanga en Limpopo in. Viljoen sê 'n groot deel van Suid-Afrika se kersieboorde is nog redelik jonk, met 64% wat vyf jaar of jonger is en nie in volle produksie is nie. Sy voeg by dat hoewel produksie oor die afgelope paar jaar gewissel het, het die 2020/21-seisoen ’n skerp toename van 60% in produksie in vergelyking met die vorige seisoen gehad. Dit beteken dat 900 ton kersies in 2020/21 geproduseer is, 300 ton meer as in 2019/20.

EN

en van die geïdentifiseerde redes vir gronduitsettings is arbeidsgeskille. Die Departement van Landbou se Jakobo Raselemane sê hierdie dispute vind plaas wanneer daar 'n diensooreenkoms is en een van die partye verbreek die kontrak. Hy sê dit sal meestal gesentreer wees rondom kwessies soos noodsaaklike dienste, soos die plaaswerker wat instem om op Sondae of openbare vakansiedae te werk en nie by die aanvanklike ooreenkoms hou nie. Hy sê 'n grondeienaar wat 'n onwettige gronduitsetting uitvoer, begaan 'n kriminele oortreding, en kan moontlik óf tronkstraf, 'n boete, óf albei, ontvang.

OFM-nuus