Calvinia-boer en gewese Boer Soek 'n Vrou-deelnemer Albertus Steenkamp is uit op R5 000 se borgtog nadat hy na bewering ‘n 22-jarige plaaswerker omgery het ná 'n rusie oor vergoeding. 

Die agt maande lange tekort aan teengif om slangbyte te behandel kry eindelik aandag. African Snakebite Institute-uitvoerende hoof Johan Marais sê die tekort hou lewensgevaar in vir mense en diere. Marais sê die maande lange proses om teengif te vervaardig is ingewikkeld en duur.

Suid-Afrikaners sal na verwagting nog minstens vir twee jaar ly onder hoë rentekoerse. Die Universiteit van die Vrystaat se senior landbou-ekonoom Frikkie Maré sê daar is boonop sprake van 'n droogte, wat mense verder kan laat noustrop trek.

Suid-Afrikaners word aangemoedig om tuis hul eie kos te kweek. Minister van Landbou, Thoko Didiza, het KwaZulu-Natal besoek waar sy die belangrikheid van voedselsekerheid beklemtoon het, en om gemeenskappe te help om self-onderhoudend te word.

EN

'n Pampoen van kort duskant 'n ton het die skaal laat kreun op vanjaar se Giant Pumpkin-fees op Mosselbaai. Kampioen-kweker Willem le Grange se wenpampoen het 903 kg geweeg en is net 1,5 kg ligter as sy rekord-pampoen van verlede jaar. Netwerk24 berig dit was ’n Suid-Afrikaanse rekord.

OFM-nuus