Die Universiteit van die Vrystaat het ’n belangrike stap vorentoe geneem in die bevordering van tegnologiese innovasie in landbou-onderrig met die onlangse ontvangs van ’n hommeltuigskenking van die Rectron Groep – ’n  filiaal van die Mastec Groep. 

Die skenking is deel van die maatskappy se korporatiewe maatskaplikebeleggingsprogram PEU wat daarop gemik is om tegnologiese vaardighede onder die jeug van Suid-Afrika te verbeter.

Prof. Johan van Niekerk, vise-dekaan van die Fakulteit Natuur- en Landbouwetenskappe, het die belangrikheid van hierdie skenking vir die universiteit en die breër landbousektor beklemtoon. 

Die gebruik van hommeltuie is belangrik vir die landbousektor. Foto: Pixabay

"Ons studente studeer klaar, maar hulle het geen praktiese ondervinding nie. Hierdie skenking stel ons in staat om studente op te lei in gevorderde hommeltuig-tegnologie, wat die toekoms van landbou is. Studente kan sien hoe dit werk en dit eendag in hul boerderypraktyke of navorsing gebruik."

Kutlwano Rawana, mensehulbronbestuurder van die Rectron Groep, sê die PEU-program fokus op die verbetering van onderwys deur tegnologie. 

"Ons fokus op onderwys deur middel van die projekte wat ons in verskeie gemeenskappe doen. Vandag vier ons ’n nuwe vennootskap met die Universiteit van die Vrystaat, waar ons ’n landbou-hommeltuig skenk. Dit is ’n groot belegging, maar dit gaan oor die skep van geleenthede vir studente om tegnologie in die landbou te leer ken."

 Van Niekerk het ook die belangrikheid van tegnologie vir die toekoms van landbou en voedselproduksie beklemtoon. "Ons moet in die volgende 30 jaar vir twee miljard meer mense kos voorsien sonder om meer grond te gebruik. Dit beteken dat ons tegnologie moet gebruik om meer kos te produseer. Maatskappye soos Rectron speel ’n groot rol in hierdie proses."

Rawana sê hierdie skenking is nie net ’n eenmalige skenking nie. "Ons visie en doelwit is om voortdurend vennootskappe te vestig en geleenthede te vind waar ons nie net skenk nie, maar ’n groter maatskaplike impak skep. Ons KMB-program is daarop gemik om geleenthede te identifiseer waar ons vaardighede kan oordra en ’n positiewe verandering kan bewerkstellig."

‘Hulle sal lisensies kry om hommeltuie te mag vlieg’

’n Ander kritieke aspek van hierdie inisiatief is die opleiding van studente as hommeltuig-operateurs. "Ons gaan saam met Rectron werk om studente op te lei as hommeltuigoperateurs. Hulle sal lisensies kry om hommeltuie te mag vlieg, wat hulle ’n voorsprong sal gee in die moderne landboubedryf," sê Van Niekerk.

Die studente is opgewonde oor die nuwe toevoeging tot hul kurrikulum. "In die begin was hommeltuie klein en snaaks, maar nou besef boere en studente hoe waardevol hulle vir landbou is. Dit gaan baie koste bespaar en die bedryf baie makliker maak in die toekoms," sê Rawana.

Die Universiteit van die Vrystaat hoop om studente voor te berei vir die uitdagings en geleenthede van moderne landbou. Deur hierdie vennootskap met die Rectron Groep, word ’n platform geskep waar tegnologie en onderwys hand aan hand gaan om ’n volhoubare en produktiewe toekoms vir die Suid-Afrikaanse landbousektor te verseker.

OFM/Agriculture dg