Die Oos-Vrystaat is die afgelope naweek (6-7/7) deur verwoestende brande getref wat groot verliese aan weiding, infrastruktuur en vee gebring het.

Die Vrystaatse LUR vir Landbou, Elzabé Rockman, het die geaffekteerde areas besoek om die situasie eerstehands te beoordeel en met boere te gesels oor hul bekommernisse en behoeftes. Gedurende haar besoek het Rockman opgemerk dat die brande steeds nie heeltemal geblus is nie.

Hoewel daar pogings is om die vure onder beheer te bring, is die brande steeds aan die beweeg en nader hulle die Golden Gate area. Tot dusver is geen lewensverlies aangemeld nie, maar die skade aan vee en wild, sowel as infrastruktuur, is beduidend.

Daar is reeds skade aan besproeiingstelsels en ander plaasinfrastruktuur, insluitend ’n paar akkommodasie-eenhede by oorde wat vernietig is.

Boere het Maandagoggend (8/7) eers begin om die volle omvang van die skade te bepaal, en dit sal waarskynlik  ’n voortdurende proses wees.

Een van die hoofbekommernisse wat deur die boere uitgelig is, is die ongunstige weerstoestande, spesifiek die sterk wind en die uiters koue temperature wat die risiko vir opvlamming van die brande verhoog.

Rockman het ook benadruk hoe belangrik dit is dat mense uiters versigtig moet wees met vure, veral dié wat vir verwarming of kook gebruik word, om te verhoed dat nuwe brande ontstaan.

‘Sy het bevestig dat daar konstante kommunikasie met die boere sal wees’

’n Ander dringende behoefte is die voeding van vee en wild wat na veiliger plekke verskuif is. Rockman het bevestig dat daar nou na hierdie kwessies gekyk word en dat daar konstante kommunikasie met die boere sal wees om verdere hulp te bied.

Rockman het haar skok uitgespreek oor die verwoestende tonele wat sy gesien het. Sy het Clarens, wat twee maande gelede nog ongerep was, besoek en die huidige toestand as “regtig verwoestend” beskryf met die swart gebrande gras en berge.

Die Dihlabeng Plaaslike Munisipaliteit werk nou saam met die betrokke Boereverenigings en die Brandbeskermingsvereniging om die krisis te hanteer. Die burgemeester en drie van sy raadslede het ook die oggend by Rockman aangesluit om die skade te beoordeel en te kyk waar die munisipaliteit hulp kan verleen.

‘Sy het ’n boodskap van hoop aan die geaffekteerde boere gerig’

Rockman het haar waardering uitgespreek vir die toewyding en vasberadenheid van almal wat betrokke is by die pogings om die brande te beheer. Sy het ook die oop kommunikasie en samewerking tussen verskillende boere geprys en hoop uitgespreek dat hierdie samewerking ’n sterk basis sal vorm vir toekomstige ondersteuning en hulp.

Sy het ook ’n boodskap van hoop aan die geaffekteerde boere gerig, en benadruk dat die feit dat sy persoonlik daar was om die skade te aanskou en ondersteuning te bied, ’n belangrike stap is om wedersydse hulp te wys en ’n positiewe pad vorentoe te bou.

Die boere se veerkragtigheid en die samewerking tussen gemeenskappe in hierdie moeilike tyd is werklik inspirerend en Rockman het belowe dat daar alles moontlik gedoen sal word om verdere ondersteuning en hulp te bied.

OFM/Agriculture mvh