“Suid-Afrika se landbou is onafskeidbaar van die wêreldlandboumark. 

“Daarom is dit noodsaaklik om voortdurend aandag te skenk aan die produksievoorwaardes van landbouprodukte wêreldwyd, aangesien dit ’n direkte invloed het op ons plaaslike pryse en verbruikers,” sê Wandile Sihlobo, Agbiz-hoofekonoom.

Hy noem die wêreld het die afgelope paar jaar hoë voedselpryse ervaar weens verskeie redes insluitend droogte in die belangrikste landbouproduserende streke van Suid-Amerika en die oorloë in die Swartsee-gebied. In die laaste maande het die wêreldwye landboupryse en verbruikersvoedselpryse egter begin afneem.

“Voedselpryse wêreldwyd is ongeveer 25% laer as die hoogtepunt wat in Maart 2022 bereik is, kort nadat Rusland oorlog teen Oekraïne verklaar het, wat groot ontwrigting en paniek in die landboumarkte veroorsaak het.”

Globale landbouwaarnemers verskuif hul fokus na die nuwe produksieseisoen wat 2024/25 is vir graan en oliesade. Die produksie het onlangs in die Noordelike Halfrond se somerseisoen begin.

“Produsente in die Suidelike Halfrond sal waarskynlik teen Oktober begin om hul grond voor te berei. Hoewel dit nog vroeg in die seisoen is en baie nog moet gebeur, voorspel die Internasionale Graanraad ’n redelike oes. Sy jongste opdatering stel die 2024/25- wêreldwye graan-en-oliesadeproduksievoorspelling op 2,3 miljard t, effens hoër as die vorige seisoen.”

Sihlobo voeg by die voorraad sal na verwagting gesond wees, ongeveer 582 miljoen t, hoewel dit effens gedaal het vanaf die 2023/24-seisoen weens die verwagte toename in die industriële gebruik van graan.

Verskeidenheid van grane. Foto: Getty Images

Daar is ook ’n bemoedigende vooruitsig wat die belangrikste graansoorte soos rys, koring, mielies en sojabone betref. “Wêreldwye rysproduksie vir 2024/25 sal na verwagting met 528 miljoen t of 1% styg. 

“Dit is gegrond op groter verwagte oeste in al die belangrikste rysstreke soos Indië, Viëtnam, Thailand, Amerika, China, Pakistan, Indonesië, Bangladesj en die Filippyne. Gevolglik kan die voorraad ook met 1% tot 175 miljoen t styg.”

Druk op sojabonepryse gunstig vir die dierevoerbedryf

Die produksievooruitsigte vir 2024/25 se wêreldwye sojabone is ook positief en word geskat op 415 miljoen t, ’n toename van 6% jaar-tot-jaar. Dit is gegrond op verwagte groot oeste in Amerika, Brasilië, Argentinië, Indië en Paraguay. 

“Aangesien byna die helfte van die produksie deur die Suidelike Halfrond se produsente, spesifiek Suid-Amerika, geproduseer word, beskou ons hierdie data as voorlopig totdat die seisoen in daardie streek oor ongeveer twee maande begin.”

As die huidige ramings ’n werklikheid word, sal die 2024/25- wêreldwye sojabonevoorraad met 16% jaar-tot-jaar tot 79 miljoen t styg. ”So ’n toename in die oes en voorraad sal druk op die wêreldwye sojabonepryse plaas, wat gunstig is vir die dierevoerbedryf.”

Wandile Sihlobo, Agbiz-hoofekonoom. Foto: Agbiz

Sihlobo maan egter ’n minder optimistiese siening bestaan wel in die geval van belangrike graansoorte soos koring en mielies, hoewel hul voorrade op bogemiddelde vlakke sal bly. 

“Daar word voorspel dat die 2024/25- wêreldwye koringproduksie op 793 miljoen t sal wees, effens laer as die 2023/24-seisoen se oes van 804 miljoen t. Dis weens verwagte produksiedalings in die Europese Unie, Brittanje, Oekraïne en Rusland weens die oormaat nat weerstoestande in hierdie lande gedurende die seisoen, wat swak opbrengste verwag.”

Aangesien voedsel- en industriële gebruik van koring na verwagting sterk sal bly, het die Internasionale Graanraad die 2024/25 wêreldwye koringvoorraad op 261 miljoen t geplaas, ’n daling van 3% jaar-tot-jaar. 

“Tog het internasionale koringpryse nie op hierdie verwagtinge gereageer nie en het die laaste weke op ’n gematigde pad gebly, wat ’n welkome ontwikkeling vir verbruikers is.”  

Hierdie artikel het oorspronklik op Agricultural Market Viewpoint verskyn. dg/mc