Dr. Anathi Makamane se eerste blootstelling aan landbou het reeds kleintyd begin toe sy op die platteland grootgeword het. Omring deur landboubedrywighede het sy geleer van plant, oes en veebestuur, wat ’n diep waardering vir landbou in haar gevestig het.

Dié boorling van Queenstown (deesdae Komani) in die Oos-Kaap is vandag ’n professor in die departement van volhoubare voedselstelsels en ontwikkeling aan die Universiteit van die Vrystaat (UV). ’n PhD in volhoubare landbou, asook ’n Meestersgraad en graad in landbou-ekonomie het haar ’n diepgaande loopbaan in die landbousektor help opbou.

Makamane se tante wat reeds in die sektor werksaam was, het haar aangemoedig om ’n loopbaan in landbou-ekonomie te volg, gegrond op haar sterkpunte. Ná die voltooiing van haar graad en honneurs het Makamane by die Nuwe Vennootskap vir Afrika se Ontwikkeling aangesluit. 

Hier het sy gewerk aan verskeie landbou- en klimaatsveranderingsinisiatiewe wat haar blootgestel het aan die uitdagings en geleenthede in Afrika se landbousektor. Sy het ook die belangrikheid van beleid in die bevordering van volhoubare praktyke oor die vasteland heen besef.

As ’n professor aan die UV speel sy ’n sleutelrol in die vorming van die volgende generasie landbouers. Sy deel haar kennis en vaardighede met studente om hulle toe te rus om die uitdagings in die sektor die hoof te bied. Sy is ook aktief betrokke by navorsing oor volhoubare landbou, klimaatsverandering en landbou-voorligtingsdienste, met ’n fokus op praktiese oplossings vir kleinskaalse boere.

Sy werk ook nou saam met plaaslike boere deur ’n gemeenskapsbetrokkenheidsprojek waar sy boere onderrig oor klimaatsverandering en strategieë wat hulle kan gebruik om hul produktiwiteit te verbeter en volhoubaar te wees.

In haar loopbaan het sy drie belangrike lesse uit die landbousektor geleer – die belangrikheid van veerkragtigheid, aanpassing, en samewerking. Sy beklemtoon dat die sektor baie uitdagings trotseer, maar dat boere se vermoë om aan te pas en met ander saam te werk, ’n veelvlakkige benadering vereis om struikelblokke te oorkom.

‘Almal volg unieke paaie’

Makamane hoop dat haar nalatenskap die belangrikheid van ’n opregte lewe en die nastreef van drome sal weerspieël. Sy glo dat almal unieke paaie het om te volg en sy wil ander inspireer om hul ware self te omarm en hul passies met moed en vasbeslotenheid na te jaag.

Wat haar visie vir die toekoms van landbou in Suid-Afrika betref, is sy ambisieus. Sy sien ’n sektor voor haar wat hoogs produktief, volhoubaar en inklusief is met ’n sterk fokus op kleinskaalse boere en groter beleggings in navorsing en ontwikkeling. 

Sy droom van ’n Suid-Afrika wat klimaatslim landboupraktyke toepas en aanpas by klimaatslim tegnologieë, wat bydra tot ’n florende landbousektor en die ontwikkeling van die land as geheel.

OFM Agri/Robyn Schutte dg