Die departement van water en sanitasie monitor die Vaaldam se waterinvloei noukeurig terwyl swaar reën voortduur. Dit word gedoen om te verseker dat die dam se veiligheidstandaarde gehandhaaf word en vloedtoestande beperk word. Die dam se vlak is op 98,99%, en in ooreenstemming met die departement se vloedbestuursplan word 61,2 kubieke meter per sekonde (m³/s) deur vyf kleppe vrygelaat om ’n balans tussen invloei en uitvloei te handhaaf.

Die Vaaldam het agt kleppe vir rivierafvoer waarvan twee normaalweg daagliks tussen 16.8 m³/s en 17.6 m³/s vrylaat word om die natuurlike vloei te handhaaf. Die Bloemhofdam wat stroomaf van die Vaalrivier-opvanggebied geleë is, is op 100,94% met ’n bykomende 16% vloedabsorpsievermoë. Weens verhoogde rivierinvloei en onlangse reënval in die Bloemhof-gebied word water nou teen 320 m³/s vrygelaat om die dam binne sy volle toevoerkapasiteit van 100% te hou.

‘Departement volg streng operasionele protokolle’

Volgens hidrologiese moniteringstelsels kan die Vaaldam binne die volgende paar dae 100% bereik wat moontlik verhoogde uitlaatvrystellings sal vereis om infrastruktuurfoute en rampe te voorkom. Die departement hou gereelde konsultasies met die Nasionale Rampbestuursentrum, provinsiale en plaaslike rampbestuursentrums, asook ander belanghebbendes soos plaaslike owerhede en boere langs die Vaalrivierstelsel.

Die departement volg streng operasionele protokolle vir damvrystellings en sal voortgaan om waterstande noukeurig te monitor en opdaterings te verskaf. Die departement herinner gemeenskappe om bewus te wees van moontlike waterstygings en maatreëls te tref vir moontlike ontruimings in die geval van oorstromings.

OFM Agri dg